Бахши ҷавонон, варзиш ва сайёҳии шаҳри Кӯлоб чанде пеш дар толори мактаби бачагонаи рассомии шаҳр, даври аввали Фестевали ҷумҳуриявии рассомони ҷавонро таҳти унвони "Тоҷикистон - кишвари афсункор" бахшида ба "Соли ҷавонон" байни хонандагони мактабҳои миёнаи шарҳ баргузор намуд.

Дар Фестевал 20 нафар хонандагон аз мактабҳои шаҳр иштирок намуда, аз рӯйи се шарт: пешниҳоди колексияи расмҳо, санъати рассомӣ ва санъати мусаввара дар мавзуи "Тоҷикистон-кишвари афсункор" маҳорати худро пешкаши ҳакамон намуданд.

Шаҳло Ҳасанова гуфт, ки баргузории Фестевали мазкур пеш аз ҳама кашфи кӯдакони болаёқат ва фароҳамсозии имконот барои худтакмилдиҳии онҳо, инкишоф додани тафаккури кӯдак оид ба сифат, тарбияи кӯдакон дар руҳияи ватандӯстӣ равона шудааст.

Аз рӯи натиҷагирӣ Муҳаммади Ҷамшед, хонандаи МТМУ №2 бо гирифтани 10 хол ҷойи якумро ишғол намуд. Ҳусния Абдуллоева, тарбиятгирандаи МТМУ №4 бо 9 хол ҷойи дуюм ва Аҳлиддин Амиров, аз МТМУ №10 бо гирифтани 8 хол мақоми сеюмро соҳиб шуд.

Дар охир рассомон оид ба дастовардҳо, нозукиҳои касби рассомӣ ва мушкилотҳои ҷойдошта ибрози андеша карда, ба масъулин пешниҳодҳои муфид намуданд.

Умед Мирзоев, "ҶТ"