Дар боғи фарҳанги-фароғатии ба номи Раҳмон Мурчаеви шаҳри Қӯрғонтеппа Фестивал-озмуни телевизионии «Бӯстон-2017», ки бо ибтикори Муассисаи давлатии телевизиони «Сафина» бахшида ба “Соли ҷавонон” эълон гардидани соли 2017 роҳандозӣ гардидааст, баргузор шуд.

Дар озмун намоиши ҳунарҳои мардумӣ, аз қабили гулдузӣ, қуроқдузӣ, муҳрабофӣ, кешбофӣ, адрасу атласбофӣ, чубтарошӣ, дуғкашӣ, нишоллопазӣ, маҳсули дастони кадбонуҳои ҷавон бо пешниҳоди хурокҳои миллӣ, ки зиёда аз 30 намудро ташкил медод, пешкаши ҳакамон шуда, ба маҳсули дастони онҳо баҳои баланд доданд.

Ба иттилои масъулони дастгоҳи раиси шаҳри Қӯрғонтеппа, дар фестивал-озмун кормандони бахши фарҳанг ва гурӯҳи ҳаваскорони шаҳр баромад намуда, ҳунару санъати волои худро пешкаши ҳаводорони сершумор гардониданд.

Чуноне ки дастандаркорони ин чорабинӣ арз доштанд, ин озмун аз «Бӯстон»-и дар гузашта машҳур фарқи калон дорад. Чунки ҳадаф аз ташкил намудани он эҳёи ҳунарҳои миллӣ, дарёфти падидаҳои нав, ҷавонону наврасони ҳунарманду соҳибистеъдод ва раҳнамун сохтани онҳо ба роҳи санъат мебошад.

Дар ҷамъбаст аъзои ҳакамон ҳунари сарояндагии Музаффар Маҳмудов, рақси “Гулноз”-и Мавзуна Холиқова, рақси мардонаи Самариддин Латипов, рақси яккаи Мавлуда Ватанова, бадеҳахон Машраб Қодиров ва Марҳамат Маҷидова, рақси гурӯҳи бо номи «Навниҳолони боғи истиқлол»-и ансамбли рақсии “Ситора”-и шаҳр, доирабазми хонандагони мактаби санъати бачагонаи шаҳр, ва саҳначаи ҳаҷвиро бо диплом сарфароз гардониданд.

Умед Мирзоев, “ҶТ”