Имрӯз, 18 октябр, дар Муассисаи давлатии “Китобхонаи давлатии бачагонаи ҷумҳуриявии ба номи М. Миршакар” Намоишгоҳи ҳаштуми байналмилалии “Китоби Душанбе” оғоз гардид.

Шамсиддин Орумбекзода, вазири фарханги ҷумҳурӣ, Намоишгоҳи ҳаштуми байналмилалии “Китоби Душанбе”-ро ифтитоҳ бахшида, тамоми иштирокчиён ва меҳмононро хайрамақдам намуда, иброз доштанд: “Маҳз аҳли фарҳанг баҳри ба наслҳои оянда бегазанд расонидани арзишҳои маънавии гузаштагон талош варзида, анъанаҳои таърихии миллатро зинда нигоҳ медорад ва сайқал медиҳад. Бо ин каломи раҳнамунсози Асосгузори сулҳу ваҳдати миллӣ, Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ба суханони худ ифтитоҳ бахшида дар ин рӯзи фархунда изҳори умед мекунам, ки ноширон ва аҳли адабу ирфони кишвар ва кулли ашхосе, ки бо беҳтарин неъмат – китоб сару кор доранд, рисолати таърихии худро дар бобати пайваста зинда нигоҳ доштани мероси пурғановати аҷдодиямон, ки пеш аз ҳама тавассути китоб ва эҷоди асарҳои баландмазмун амалӣ мешавад, бо ифтихори миллӣ ба ҷо меоранд”.

“Ҳамаи шумо хуб медонед, ки бо мусоидат ва дастгириҳои Ҳукумати ҷумҳурӣ аз соли 2010 инҷониб ҳамасола баргузории Намоишгоҳи байналмилалии китоб дар пойтахти кишвари азизамон бахшида ба рӯзи китоб ба ҳукми анъана даромадааст, ки аз ҷониби мақомоти олии кишвар ва кулли фарҳангиён ва аҳли ҷомеа хуш пазируфта мешавад ва дар таҳкиму густариши равобити фарҳангии кишвари соҳибистиқлоламон ба мамоликҳои қарину дӯсту бародар нақши созгоре мебозад. Тамоми дастовардҳои инсоният тӯли қарнҳо маҳз дар хазинаи китоб ба таври эътимодбахш нигоҳ дошта мешавад. Хизматеро ки китоб дар инъикос ва ҳифзи таърих адо мекунад, ҳеҷ як шакли чопии электронӣ иваз карда наметавонад. Хушбахтона, дар хонадони тамоми наслҳои тоҷикон аз даврони ориён то имрӯз китоб беҳтарин нигора маҳсуб меёбад”, - таъкид намуд Шамсиддин Орумбекзода, вазири фарҳанг дар идомаи суханронии хеш.

Таъкид гардид, ки мақсад аз баргузор намудани Намоишгоҳи байналмилалии “Китоби Душанбе”, қабл аз ҳама, саҳмгузорӣ дар рушди соҳаи табъу нашри кишвар буда, инчунин рушди ҳамкориҳои ноширони тоҷик бо ноширони кишварҳои хориҷӣ ва ба ин васила муаррифии муассисаҳои нашриявии ватанӣ дар арсаи ҷаҳонӣ мебошад.

Дар намоишгоҳи мазкур ноширони дохиливу хориҷӣ ва намояндагон аз кишварҳои Русия, Ӯзбекистон, Қазоқистон, Туркия, Фаронса, Ҳиндустон, Афғонистон ва ИМА иштирок намуда, маҳсули чопии худро ба маърази тамошо гузоштанд.

Пас аз оғози Намоишгоҳи ҳаштуми байналмилалии “Китоби Душанбе” дӯстдорону ҳаводорони китоб ба ҳар гӯшаи омоданамудаи нашриётҳои ватанию хориҷӣ рафта, китобҳои дилписандаи худро ҷӯё мешуданд. Намоишгоҳи мазкур дар воқеъ, ба иди ҳақиқии китоб мубаддал гардида буд.
Дар ин рӯз ҳамчунин ноширони ватанӣ иқдом нишон дода, маҳсули чопии хешро бо панҷоҳ дарсад тахфиф ба фуруш бароварданд, ки яке аз чунин ноширон, раиси ташкилоти ҷамъиятии байналмилалии (ТҶБ) “Истиқбол” Латофат Кенҷаева мебошад. Аз ин иқдом иштирокчиёни намоишгоҳ хушнуд гардида, китобҳои мавриди назари хешро харидорӣ намуданд.

Ёдовар мешавем, ки намоишгоҳ тӯли се рӯз аз 18 то 20 октябр идома ёфта, дар доираи он конфронси илмӣ дар мавзӯи “Ҷойгоҳи китоби қоғазӣ дар шароити рушди технологияи иттилоотӣ”, маҳфили шеъру суруд дар васфи китоб, муаррифии китобҳои тозанашри муассисаҳои нашриявии ватанӣ ва мубодилаи афкори ноширони ватанию хориҷӣ ва озмуни “Қироати шеъру тарона дар васфи ватану диёр” бо иштироки хонандагони мактабҳо баргузор мегарданд.