Зери ин ном шоми 16 август дар шаҳри Душанбе бо ташаббуси волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон маҳфили адабию фарҳангии "Ҷомӣ ва Навоӣ - пайвандгари миллатҳо" ба ифтихори солгарди Абдурраҳмони Ҷомӣ, пойдории дӯстии тоҷику ӯзбек ва сафари давлатии Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ба Ҷумҳурии Ӯзбекистон баргузор гардид.

Дар чорабинии мазкур раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода, ҷавонони фаъолу ташаббускор, волонтёрон, гирандагони стипендияи Президенть, рӯзноманигорон ва муҳассилини болаёқати муассисаҳои таълимии пойтахт иштирок намуданд.

Дар маҳфил шеърҳо аз эҷодиёти бузургони адаби тоҷику ӯзбек - Мавлоно Абдурраҳмони Ҷомӣ ва Алишер Навоӣ, таронаҳо дар васфи дӯстии ду халқи ба ҳам бародар замзама карда шуданд.

Раиси Кумита Аҳтам Абдуллозода зимни суханронӣ иброз намуданд: "Маҳз бо талошҳои беандозаи Пешвои муаззами миллатамон муҳтарам Эмомалӣ Раҳмон имрӯз равобити миёни халқҳои тоҷику ӯзбек дар сатҳи баланд аст. Таваҷҷӯҳ ва фароҳамоварии шароити мусоид аз ҷониби роҳбарияти давлату Ҳукумат аст, ки ҷавонони мо ба илму адаб завқ доранд ва сулҳу ягонагӣ ва ваҳдати халқҳоро дар эҷодиёташон васф менамоянд".

Баргузории маҳфили адабию фарҳангии "Ҷомӣ ва Навоӣ - пайвандгари миллатҳо" аз ҷониби волонтёрон ба хотири тарғиби дӯстии миёни ду миллати бузург - тоҷику ӯзбек иқдоми арзанда арзёбӣ шуд.