Дар шаҳри Норак озмуни “Ҳусну ҳунарам зебост” доир гардид.

Дар он тарроҳони беҳтарин бо либосҳои омоданамудаашон иштирок намуда, маҳсули кори худро ба маърази тамошо гузоштанд.

Баҳодур Ятимов, мудири Бахши ҷавонон, варзиш ва сайёҳии шаҳри Норак ҳадаф аз баргузории  озмунро дарёфти чеҳраҳои нав дар самти ҳунармандӣ, рӯзгордорӣ ва баланд бардоштани мавқеи зан дар ҷомеа  арзёбӣ намуд.

Озмун аз бахшҳо иборат буда, ширкаткунандагон аз рӯи шартҳои  намоиши либосҳои миллӣ аз матоҳои гуногун ( гулдӯзӣ, қурокдӯзӣ),  пешниҳоди эскизҳои либосҳои миллӣ (дар албом ва шарҳи муфассали қолабу эскиз), намоиши либосҳои муосир такя ба таърих ва намоиши ҳунарҳои дастии тарроҳон миёни ҳам рақобат намуданд.

Озмуни “Ҳусну ҳунарам зебост” то охирҳои моҳи октябр дар ҳамаи шаҳру ноҳияҳо идома ёфта, ғолибони он ба даври вилоятӣ роҳхат мегиранд.