2 октябр дар кинотеатри ба номи Тоҳир Собиров нахустнамоиши филми нави Муассисаи давлатии “Тоҷикфилм”, бо номи “Ширин” баргузор мегардад.

Ба иттилои “Тоҷикфилм” дар таҳия ва наворбардории филми мазкур гурӯҳи эҷодию техникӣ ва ҳунарпешаҳои маъруфи Тоҷикистон ҷалб гардида, он бо заҳмату талоши зиёд омода шудааст.

Дар он ҳунармандоне чун Амина Ҳафизова, Саид Муродов, Салоҳиддин Шукуров, Хайрина Окилшоева, Суҳробшоҳ Давлатзода нақш бозидаанд.

Ин филми ҳунарии кутоҳ дар жанри драмаи оилавӣ эҷод шуда, дар бораи ҳаёти оилавии Ширину Саид қисса мекунад. Ҳаёти орому осудаи оила пас аз рӯйдоде ба зиндагии пурихтилоф мубаддал мегардад. Дар гирудори зиндагӣ ба қаҳрамони асосии филм - Ширин чеҳраи воқеии наздиконаш ҳувайдо мегардад. Муҳаббат ва тифли бегуноҳ сабагори наҷоти оила мегардад.

Муаллифӣ ва коргардони филм Умеда Турсунова, наворбардор Акмал Восидӣ, танзимгар Фарҳод Ғаффорпур, продюсер Маҳмадсаид Шоҳиён ва директори филм Содиқзода Кадафӣ мебошанд.

Дар хабарномаи “Тоҷикфилм” гуфта мешавад, ки ин нахустин филми коргардони ҷавон Умеда Турсунова буда, бо ин маҳсули эҷодаш ӯ ба олами синамо ворид мегардад.

Оғози нахустнамоиш соати 17:00 муайян шудааст.

Гулафшон КАРИМОВА, “ҶТ”