Чанде пеш дар ҷамоати деҳоти “Узун”-и ноҳияи Ҷалолиддини Балхӣ бахшида ба истиқболи 26-солагии Истиқлолияти давлатии Ҷумҳурии Тоҷикистон ва “Соли ҷавонон” чорабинии фарҳангь таҳти унвони “Шоми истиқлол” баргузор гардид.

Дар ифтитоҳи чорабинӣ намоиши дастовардҳои ҷавонони ҷамоати мазкур ба тамошо гузошта шуд, ки аз ҷониби меҳмонон баҳои хуб гирифт.

Ҳадаф аз баргузории чорабиниҳо, мусоидат кардан ба дарёфти истеъдодҳои нав ва ба ин васила тақвият додани ҳисси ватандӯстиву худшиносии миллӣ ва дарёфти ҷавонони соҳибистеъдод мебошад.

Мудири бахши кор бо ҷавонон ва варзиши ноҳия, Қурбонзода Хуршед чорабиниро ҳусни оғоз бахшида, зикр кард, ки ба шарофати соҳибистиқлолии кишварамон тамоми соҳаҳо рӯ ба рушд ниҳода, таваҷҷӯҳ ба ҷавонон сол то сол беҳтар мегардад.

Анзурат Абдусаломзода, муовини раиси ноҳия ҳозиринро ба эълон гардидани "Соли ҷавонон" табрик намуда, гуфт: “Ба хотири дар сатҳи баланд таҷлил намудани ин сол бо дастгирии мақомоти иҷроияи ҳокимияти давлатии ноҳия чорабиниҳои гуногун, баргузор гашта истодааст, ки  барои баланд бардоштани нерӯи ҷавонон ин тадбирҳо нақши калон мебозад”.

Ба иттилои роҳбари дастгоҳи ноҳия ин иқдом бахшида ба истиқболи 26-солагии Истиқлолияти давлатии Ҷумҳурии Тоҷикистон ва “Соли ҷавонон” аз тарафи мақомоти иҷроияи маҳаллии ҳокимияти давлатии ноҳияи Ҷалолиддини Балхӣ ва бахши кор бо ҷавонон ва варзиши ноҳия аз моҳи июли соли 2017 сар карда ҳар ҳафта рӯзҳои шанбе ва чоршанбе дар ҷамоатҳои шаҳраку деҳоти ноҳия баргузор мегардад.



Умед Мирзоев, “ҶТ”