ФАРҲАНГ
Сешанбе 21 Август 2018 07:47
4357
Бори аввал дар кишвар бо шарофати сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аз 10 то 12 май Рӯзҳои фарҳангии Вилояти Мухтори Кӯҳистони Бадахшон дар вилояти Хатлон бо иштироки аҳли зиё ва фарҳанг баргузор карда шуд.

Дар доираи он баъди аз нисфирӯзии 10 май дар мавзеи Шоҳони ноҳияи Шамсиддин Шоҳин 500 нафар аҳли фарҳангу зиёи ВМКБ-ро намояндагони вилояти Хатлон бо сарварии муовини раиси вилоят Махфират Хидирзода бо нону намак ва рақсу суруд истиқбол гирифтанд.

Дар доираи Рӯзҳои фарҳангии мазкур меҳмонон ба 5 гурӯҳ ҷудо шуда, ба шаҳру ноҳияҳои вилоят ба сафар баромаданд. Аз мавзеи Шоҳон то шаҳри Кӯлоб сокинони ноҳияҳои Шамсиддин Шоҳин, Муъминобод ва шаҳри Кӯлоб ба ду канори шоҳроҳи Кӯлоб-Дарвоз баромада, меҳмононро бо чеҳраҳои болидаю дастафшониҳо хайрамақдам гуфтанд.

Ҳамин тариқ, гурӯҳи якум, ки мансуби шаҳри Хоруғ буд, ба шаҳри Кӯлоб, намояндагони ноҳияҳои Шуғнону Ванҷ ва Мурғоб ба ноҳияи Данғара, меҳмонони ноҳияҳои Роштқалъаю Рӯшон ба ноҳияи Вахш, аҳли фарҳанги ноҳияҳои Дарвозу Ишкошим ба шаҳри Норак ва намояндагони гурӯҳи марказӣ ба шаҳри Бохтар раҳсипор шуда, онҳоро дар даромадгоҳҳои шаҳру ноҳияҳои мазкур бо шукӯҳу шаҳомати хосса пешвоз гирифтанд.

Мардуми шаҳри Кӯлоб меҳмононро дар даромадгоҳи шаҳр аз ҷониби ноҳияи Шамсиддин Шоҳин дар назди меҳмонхонаи “Роҳи Абрешим” истиқбол намуда, ба тамошои намоиши “Баҳори Ваҳдат” ба театри вилоятии ба номи С.Вализода даъват намуданд.

Зимни қабули меҳмонон дар шаҳри Кӯлоб раиси шаҳр Хайрулло Амонулло, муовинони раиси шаҳр, роҳбарони ташкилоту муассисаҳо, муҳассилин, кормандони бахши фарҳанг, театри мазҳака-мусиқии шаҳри Кӯлоб ширкат намуда, меҳмононро хуш пазироӣ намуданд.

Сипас меҳмонон дар театри мазҳака- мусиқии ба номи Сайдалӣ Вализода омада, асари Ҷумъа Қуддус “Баҳори ваҳдат”- ро тамошо намуданд. Бояд гуфт, ки асари мазкур дар бораи сулҳу салоҳ ва дар бораи чӣ гуна ба ваҳдат расидани мардум қисса мекунад.

Субҳи 11 май бошад аз ҷониби меҳмонон ва масъулини мақомоти иҷроияи ҳокимияти давлатии шаҳри Кӯлоб дар якчанд гӯшаи шаҳр чорабиниву ҳамоиш ва маҳфилҳо доир гардид. Дар китобхонаи ба номи Садриддин Айнӣ маҳфили адибони ду вилоят гарму самимӣ доир карда шуд. Адибони аз ВМКБ Лаълҷуъбаи Мирзоҳасан, Алидоди Чароғабдол, Руқияи Даврон, Шаҳзодаи Саидиброҳим, Гулнисои Ризвоншоҳ, Гулнисои Ато, Саодати Саидназар ва адибон аз шаҳри Кӯлоб шоири халқии Тоҷикистон Ҳақназар Ғойиб, Лутфи Хомуш, Хосият Вализода, Сулаймон Султон, Ҳуснигул Раҳимзода, Одина Раҳмон, Нуралӣ Яъқуб иштирок ва шеърхонӣ намуданд. Дар маҳфил аъзои маҳфилҳои “Ганҷи Хатлон” ва “Эҷод” низ ширкат намуданд. Дар толори мақомоти иҷроияи ҳокимияти давлатии шаҳри Кӯлоб конференсия таҳти унвони”Модарон дар шоҳроҳи ваҳдат” бо иштироки 5 нафар фаъолзанони шаҳри Хоруғ ва 40 нафар фаъолзанони шаҳру деҳоти Кӯлоб доир карда шуд. Дар толори қасри ҷавонони шаҳри Кӯлоб бо иштироки 15 нафар ҷавонони бадахшонӣ ва 250 нафар ҷавонони шаҳри Кӯлоб маҳфили ҷавонон таҳти унвони “Ҷавонон – пайрави пешвои миллат” доир карда шуд. Ҳамзамон, дар боғи фарҳангӣ – фароғатии шаҳри Кӯлоб аз ҷониби санъаткорони ВМКБ барномаи ҳунарӣ пешкаши ҳаводорони суруду мусиқиҳои куҳистонӣ гардонида шуд.

Рӯзҳои 11-13 май гурӯҳи кории навоҳии Рӯшон ва Роштқалъа дар доираи Рӯзҳои фарҳангии ВМКБ ҷиҳати намоиши фарҳанг ва ҳунари худ вориди ноҳияи Қубодиён шуд. Субҳи 12 май дар назди қасри фарҳанги ноҳия ҳунарҳои дастии косибон ва дӯзандагони ноҳия ба маърази тамошо гузошта шуд.

Пас аз тамошои ҳунарҳои мардумӣ меҳмонон аз осорхонаи таъриху кишваршиносии ноҳия, ки ба тозагӣ таъмир гардида буд, дидан намуда, аз таърихи ғании ноҳия, бозёфтҳои нодир ва дастовардҳои замони истиқлолият, ки бо заҳматҳо ва талошҳои Асосгузори сулҳу Ваҳдати миллӣ – Пешвои миллат, муҳтарам Эмомалӣ Раҳмон ба даст омадаанд, шиносоӣ пайдо намуданд. Сипас, дар бинои қасри фарҳанги ноҳия намоиши ҳунармандони театрҳои Рӯшон ва Роштқалъа ба саҳна гузошта шуд, ки аз тарафи тамошобинон ба ҳои баланд гирифт.

Баъд аз нисфирӯзии 12 май тибқи нақшаи тасдиқгардида маҳфилу вохӯриҳои занони Бадахшон ва Хатлон дар мавзӯи “Модарон дар шоҳроҳи Ваҳдат”, “Шоми ҷавонӣ” ва маҳфили адибон – “Ширу шакар” баргузор карда шуд.

Чорабинии “Шоми дӯстӣ” ба ҳайси ҷамъбасти рӯзҳои фарҳанги навоҳии Рӯшону Роштқалъа дар ноҳияи Қубодиён шоми 12 май дар саҳни бинои қасри фарҳанг баргузор гардид.

Гурӯҳи 170 нафараи иштирокдорони Рӯзҳои фарҳангии ВМКБ дар вилояти Хатлон, ки мансуби фарҳангиёни шаҳри Хоруғ буданд, тайи 3 рӯз меҳмони сокинони ноҳияи Мир Сайид Алии Ҳамадонӣ гардиданд. Меҳмононро бегоҳи рӯзи 11 май фаъолону аҳли ҳунари ноҳия дар даромадгоҳи ноҳия бо самимияти хосса пазироӣ намуда, то маркази ноҳия-шаҳраки Маскав, бо парафшонии парчамҳою дастафшониҳои хеш, хушомадед гуфтанд. Меҳмонони шаҳри Хоруғро дар майдони Исмоили Сомонӣ, гурӯҳи калони занҳои чакану атласпӯш бо рақсу суруд ва доирабазм пазироӣ карданд. Баъди ба анҷом расидани чорабиниҳои таҳрезишуда, меҳмонони бадахшониро ба манзилҳои муайяншудаи истиқоматии сокинони ноҳия ҷобаҷо намуданд.

Аз субҳ то нисфирӯзии рӯзи 12 май бо иштироки меҳмонон як қатор вохӯрию чорабиниҳои фарҳангӣ баргузор карда шуд. Аз ҷумла дар толори қисми ҳарбӣ мизи мудаввар дар мавзӯи “Ҷавонон-пайрави Пешвои миллат”, дар толори бинои “Тоҷиксодиротбонк” дар мавзӯи “Модарон дар шоҳроҳи ваҳдат”, дар муассисаи таҳсилоти миёнаи умумии №2 бо иштироки адибон маҳфили “Ширу шакар”, дар филармонияи ба номи О. Ҳошимов намоишномаи театри мусиқӣ – мазҳакавии ба номи Меҳрубон Назаров ва дигар чорабиниҳои фарҳангӣ доир гардид. Меҳмононро субҳи 13 май аз майдони Исмоили Сомонии шаҳраки Маскав ба ҷониби маркази вилоят – шаҳри Бохтар гусел намуданд.

13 май дар боғи “Водии Вахш”- и вилояти Хатлон, воқеъ дар шаҳри Бохтар, намоиши дастранҷи мардуми заҳматкаши ВМКБ ва вилояти Хатлон баргузор гардид. Аз рафти намоиши маҳсули дастӣ раисони вилоятҳо Давлатшоҳ Гулмаҳмадзода, Шодихон Ҷамшед ва меҳмонони олиқадр дидан намуда, ба ҳунари онҳо баҳои баланд доданд.

Дар ҳама маҳфилу нишастҳо сухан аз боби сулҳу ваҳдат, дӯстиву бародарӣ ва дастгириву иқдомҳои беназири Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон буд. Иштирокчиён дар фазои дӯстию бародарӣ Рӯзҳои фарҳангии Вилояти Мухтори Кӯҳистони Бадахшон дар вилояти Хатлонро иқдоми беназири Пешвои муаззами миллат баҳри ҳамгироию баҳамоии миллати тоҷик, рафоқат байни ҷавонони кишвар, бархурдор гаштан аз шароити эҷодӣ ва аз надик шиносоӣ пайдо кардан бо ҳолу аҳволи ҳамдигар унвон карданд. Ин ташаббус ба иштирокчиён хотироти неку фаромӯш нашуданӣ, дӯстони нав эҳдо намуда, дар ниҳоди онҳо ҳисси худшиносию созандангӣ ва меҳру муҳаббат ба Ватанро афзун намуд.

Таҳияи Хуршед Мавлон, Машҳур Имомназаров, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Август 2018 c.