Бо ибтикори Бахши ҷавонон, варзиш ва сайёҳии ноҳияи Роштқалъа дар маркази ноҳия чорабинии ҷашнӣ таҳти унвони “Наврӯзии ҷавонон” доир гашт.

Нахуст, Зўҳро Муллоҳукматова, мудири бахши ҷавонон, варзиш ва сайёҳӣ дар суханронии худ ҳозиринро ба муносибати Иди наврўзи ҷаҳонӣ табрик намуда, аз ҷумла иброз дошт, ки маҳз бо пешниҳоди Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон ва дастгирии якдилонаи сарони кишварҳои ҳамсоя бо Қарори Созмони Миллали Муттаҳид аз соли 2010 ба Наврӯз пероҳани оростаи пурарзиштаре пӯшонида шуду он Ҷашни байналмилалӣ эълон гардид.

Намоиши омода кардани таомҳои миллии хоси наврӯзӣ, баргузори бозиҳои миллии варзишӣ ва ғайра аз бахшҳои асосии "Наврӯзии ҷавонон" - ноҳия буданд, ки ба иштирокдорон хеле  писанд омад.

Ҳамчунин дар ин чорабинӣ зери навои мусиқии суннатӣ ва таронаҳои мардумӣ либосҳои миллӣ аз ҷумла сӯзанӣ, чакан, атлас ва ғайра намоиш дода шуданд. Махсусан рақсу наво аз ҷониби ҳофизону ҷавондухтарони ноҳия ба чорабинӣ шаҳомати хоса бахшид.

Дар қисмати поёнии барномаи “Наврӯзии ҷавонон” ба хотири иштироки фаъолона ва саҳмгузорӣ дар чорабинии наврўзӣ З. Муллоҳукматова аз номи Бахши ҷавонон, варзиш ва сайёҳӣ теъдоде аз нарасону ҷавонони ноҳияи Роштқалъаро  бо туҳфаҳои хотиравӣ қадрдонӣ намуд.

Машҳур ИМОМНАЗАРОВ,"ҶТ"