Ба ифтихори Рӯзи Ҷалолиддини Балхӣ дар маркази ноҳияи Дарвоз, ҷамоати Қалъаи Хумб чорабинии фарҳангӣ баргузор гардид. Дар он роҳбарону намояндагони идораву муассисаҳои маҳаллӣ, Бахши кор бо ҷавонон ва варзиш, аҳли маорифу илм, адибон, омӯзгорону хонандагони МТМУ – и ноҳия иштироку баромад карданд.

Мудири бахш Талабшо Аламов қайд кард, ки ҷавонон бояд ашъори бузургони форсу тоҷик, бахусус Ҷ. Балхиро самаровар мутолиа кунанд, зеро он намунаи рӯшани таҳаввули худшиносии мо ба шумор меравад.

Инчунин омӯзгорон Фаридун Сафаров ва Нурмаҳмад Буров дар мавзӯъҳои “Ҳаёту фаъолият ва ашъори гаронмояи Ҷалолиддини Балхӣ”, “Маснавии маънавӣ ва нақши он дар тарбияи ҷавонону наврасон” маърӯза намуда, хонандагону ҷавонон бошад шеърҳои пурғановати Мавлоноро қироат карданд.

Аз тарафи ансамбли фарҳанги Дарвоз беҳтарин барномаи консертӣ пешкаши иштирокдорон гашт.