Дар давоми як рӯз 11-ҳолати вайрон намудани Қонуни Ҷумҳурии Тоҷикистон “Дар бораи танзими ҷашну маросим” муайян карда шудааст.

Бино ба иттилои Раёсаи шуъбаи корҳои дохилии шаҳри Душанбе, зимни баргузории рейду амалиётҳои санҷишӣ аз ҷониби кормандони ин ниҳод танҳо рӯзи 26 август, 11-ҳолати вайрон намудани Қонуни Ҷумҳурии Тоҷикистон “Дар бораи танзими ҷашну маросим” муайян гардид.

- Мутаассифона, новобаста аз таъкидҳои ҳамешагӣ ҳастанд шаҳрвандоне, ки зимни баргузор намудани маросимҳои гуногун талаботи қонуни мазкурро сарфи назар намуда, ба исрофкорӣ даст мезананд,-зикр менамояд манбаъ.

Гуфта мешавад, ки нисбати 11 нафари ба қонуншиканӣ роҳ дода, тибқи талаботи моддаи 481 Кодекси ҳуқуқвайронкунии маъмурии Ҷумҳурии Тоҷикистон протоколҳои маъмурӣ тартиб дода шудааст.

Вобаста ба ин ҳолат милитсияи шаҳри Душанбе аз шаҳрвандон хоҳиш менамояд, ки талаботи қонунгузориро ба таври қатъӣ риоя намоянд, зеро риояи қонун кафили осудаҳолии онҳост.

Фарзонаи УМАРАЛӢ, “ҶТ”