Корхонаи воҳиди давлатии бонки амонатгузории Ҷумҳурии Тоҷикистон “Амонатбонк” дар соли 2024 аз ҳисоби захираҳои дохилию хориҷӣ ба зиёда аз 69 ҳазор муштарӣ 2,5 млрд сомонӣ маблағҳои қарзӣ пешниҳод намудааст, ки дар муқоиса ба соли 2023 ҳаҷми қарздиҳӣ 36 фоиз ва шумораи қарзгирон 31,3 фоиз зиёд гардидааст.

Дар хусус Алиҷон Салимзода, раиси Амонатбонк зимни нишасти матбуотӣ ба хабарнигорон иттилоъ дод.

Ӯ аз ҷумла қайд намуд, ки қарзҳои додашуда ба соҳаҳои саноат 10,7 фоиз, кишоварзӣ 16,2 фоиз, истеъмолӣ 46,9 фоиз, сохтмон 10,3 фоиз, тиҷорат 15,1 фоиз, нақлиёт 0,2 фоиз ва хизматрасонӣ 0,6 фоиз рост меояд.

Дар ин давра бонк 111 млн сомонӣ андозу пардохтҳои ҳатмиро ба буҷети давлат пардохт намудааст, ки нисбат ба соли 2023 19 фоиз зиёд мебошад.

Ҳамчунин, гуфта шуд, ки бо мақсади саҳмгузорӣ дар таъмини амнияти озуқаворӣ ва татбиқи дигар барномаҳои давлатӣ дар самти дастгирии иҷтимоии аҳолӣ Бонк иқдомҳои қарзҳои имтиёзнокро зери унвони “Баҳор-2024”, “ Кишоварз”, “Автоқарз”, “Занҳои муваффақ”, “Орзуҳои солинавӣ-2025”, инчунин “Қарзҳои ипотекӣ”-ро роҳандозӣ намудааст.

Шаҳло ЭШОНОВА, “ҶТ”