То чанд соли дигар дар пойтахти кишвар, шаҳри Душанбе ва ноҳияҳои атрофи он ягон бинои 1, 2 ва 3-ошёна боқӣ намемонад.

Ин нукта имрӯз, зимни нишасти хабарии Кумитаи меъморӣ ва сохтмони назди Ҳукумати Ҷумҳурии Тоҷикистон баён гардид.

Низом Мирзозода, раиси Кумитаи мазкур зикр намуд, ки ҳатто биноҳои баландошёна низ, ки ба талабот ва меъёрҳои сохтмон ва меъмории муосир ҷавобгӯ нестанд, тахриб мешаванд. Аз зумраи чунин биноҳо якчанд биноҳои истиқоматии баландошёна дар ҳудуди ноҳияи Рӯдакӣ, тамоми навъи биноҳои якошёнаи пойтахт, ки намои зоҳириашон ҳусни шаҳрро коста мегардонаду бо истифодаи масолеҳи куҳнаи сохтмонӣ солҳои пеш бунёд шудаанд, аз байн бардошта шуда, ба ҷояшон биноҳои хуштарҳу замонавӣ бунёд хоҳад шуд.

Гуфта шуд, ки дар радифи чунин биноҳои тахрибшаванда Театри давлатии академӣ-драмавии ба номи А. Лоҳутӣ ва Чойхонаи Роҳат низ шомил аст.