Дар Душанбе барои марҳилаи дуюми сохтмони метро Ёддошти тафоҳум ба имзо расидааст.

Дар ин бора имрӯз Азим Иброҳим, вазири нақлиёти Ҷумҳурии Тоҷикистон зимни нишасти хабарӣ бо рӯзноманигорон иттилоъ дод.

Ӯ зикр кард, ки ин Ёддошти тафоҳумро бо Кореяи Ҷанубӣ субҳи ҳамин рӯз (24 июл) ба имзо расонид ва барои имзо он ба ҷониби дигар фиристода шудааст.

- Сохтмони метро аслан аз се марҳила иборат аст ва мо дар марҳилаи якум дар масъалаи дар Душанбе имкони сохтмони метро ҳаст ё не таҳқиқот гузаронидем ва ба хулосае омадем, ки имкон дорад, - гуфт вазир.

Инчунин ӯ зикр кард, ки ҳамаи маблағгузориҳо аз ҷониби Кореяи Ҷанубӣ сурат мегирад.

- Корҳо дар ин самт рафта истодаанд, мутахассисони ду ҷониб кор карда истодаанд ва мо бовар дорем, ки ин масъала хуб пеш меравад, - илова кард Азим Иброҳим.

Ёдовар мешавем, ки 14 марти соли 2022 байни Вазорати нақлиёти Ҷумҳурии Тоҷикистон ва корпоратсияи “Роҳи оҳани миллии Корея” (Korean National Railway е Korea Railroad Corporation) дар шакли маҷозӣ Ёддошти тафоҳум оид ба омӯзиши имконияти сохтмони роҳи метро дар шаҳри Душанбе ба имзо расид, ки зери ин санад Вазири нақлиёти Тоҷикистон Азим Иброҳим ва раиси корпоратсияи “Роҳи оҳани миллии Корея” Ким Хангёнг имзо гузошта буданд.

Дар асоси ин санад мутахассисони Тоҷикистон ва Кореяи Ҷанубӣ давоми 11 моҳ ҷанбаҳои ташкилию ҳуқуқии сохтмони метро дар шаҳри Душанберо таҳлил ва таҳқиқ намуданд.

22 августи соли 2023 Вазорати нақлиёти Тоҷикистон ва Бонки содиротию воридотии Кореяи Ҷанубӣ, ки бо номи “Эксимбонк”-и Кореяи Ҷанубӣ низ маъруф аст, барои маблағгузории омӯзиши пешакӣ ва асосноккунии техникию иқтисодии сохтмони метрополитен дар Душанбе Ёддошти тафоҳум ба тасвиб расонида буданд.