Дар асоси дастуру супоришҳои Пешвои миллат, Президенти кишвар, муҳтарам Эмомалӣ Раҳмон дар мулоқот бо фаъолони пойтахт, ки 15 феврали соли 2017 доир гардида буд, шанбеи гузашта Сарвазири мамлакат Қоҳир Расулзода ва раиси шаҳри Душанбе Рустами Эмомалӣ бо ҷараёни корҳои азнавсозӣ ва ободонии боғҳои фарҳангӣ-фароғатӣ, майдонҳои варзишӣ ва бозии кӯдакони маҳаллаҳои шаҳри Душанбе шинос шуданд.

Нахуст Сарвазири мамлакат ва Раиси шаҳри Душанбе бо лоиҳаи азнавсозии Муассисаи давлатии Боғи фарҳангӣ-фароғатии “Айнӣ”-и ноҳияи Исмоили Сомонӣ шинос шуданд. Тибқи тарҳи нав дар боғи мазкур иншооти ҷадид, аз қабили даромадгоҳ, истгоҳи нақлиётӣ, амфитеатр, бинои маъмурӣ, таҷдиди ҳайкалҳои Садриддин Айнӣ ва Бобоҷон Ғафуров, ду шипанг ба андозаи 12 бар 12 метр ва дигар иншооти фарҳангиву фароғатӣ пешбинӣ шудааст.

Зимни шиносоӣ ва боздид аз маҳалли ободонӣ Сарвазири мамлакат таваҷҷуҳи сохтмончиёнро ба анҷоми корҳои босифат, истифодаи масолеҳи хушсифати сохтмонӣ, бунёди роҳраву гулгаштҳои замонавӣ, истифодаи таҷҳизоти муосири рӯшноидиҳанда ҷалб намуда пешниҳод кард, ки тарҳи амфитеатр бояд аз дигар чунин иншооти шаҳр ба куллӣ фарқ дошта бошад ва барои 1200 ҷойи нишаст тарҳрезӣ шавад. Яке аз вазифаҳои асосӣ дар таҷдиди иншоот бунёди майдончаҳо барои кӯдакон маънидод гардид.

Мувофиқи нақшаи чорабиниҳои Мақомоти иҷроияи маҳаллии ҳокимияти давлатии шаҳри Душанбе дар пойтахт бунёди 78 майдонҳои варзишӣ ва бозии кӯдакон ба нақша гирифта шудааст, ки аз ҷониби вазорату идораҳо ва соҳибкорони алоҳида бунёд мегарданд. Сарвазири мамлакат бо ҷараёни бунёди майдони варзишӣ ва бозии кӯдакон дар ҳудуди хонаҳои хиёбони Рӯдакӣ №96 ва кӯчаи Маҳмадулло Холов №4, ки бо ибтикори Хадамоти гумруки назди Ҳукумати Ҷумҳурии Тоҷикистон сохта мешавад, аз наздик шинос шуданд. Зимни боздид ба масъалаи истифодаи самараноки ҳамаи унсурҳои бинокорӣ ва ҳар чӣ хубтар истифода бурдани масолеҳи хушсифат аҳамияти ҷиддӣ дода шуд.

Кормандони Палатаи ҳисоби Тоҷикистон тасмим гирифтаанд, ки дар ободонии назди биноҳои истиқоматии 14 ва 16-и маҳаллаи 11, кӯчаи ба номи М.Шерализодаи ноҳияи Сино саҳмгузор бошанд. Дар ин маҳалла дар масоҳати умумии 3675 метри мураббаъ корҳои сохтмонӣ ва ободонии майдони варзишӣ, аз ҷумла барои волейболу баскетбол, футбол, тамрин ва майдонҳо барои кӯдакон ва дигар иншоот ба накша гирифта шудааст. Масъулон изҳори итминон намуданд, ки дар муҳлатҳои кутоҳтарин иншооти варзишӣ—истироҳатиро барои истифода омода месозанд.

Сарвазири мамлакат ва раиси шаҳр ҳамчунин аз маҳалли бунёди майдони варзишӣ ва бозии кӯдакон дар назди бинои истиқоматии рақами 79, воқеъ дар маҳаллаи 23, кӯчаи Мушфиқии ноҳияи Фирдавсӣ, ки корҳои ободониву бунёдии онро Кумитаи андози назди Ҳукумати мамлакат ба уҳда гирифтааст, дидан намуданд. Масоҳати умумии майдончаи варзишӣ 750 метри мураббаъ буда, арзиши сохтмонаш беш аз 450 ҳазор сомониро ташкил медиҳад.

Хотиррасон менамоем, ки Кумитаи андоз дар шаҳри Душанбе бунёди 5 адад чунин майдонҳои варзишӣ ва бозии кӯдаконро ба зимма гирифтааст.
Дар бунёди майдончаҳои варзишии шаҳри Душанбе кормандони Агентии хариди давлатии мол, кор ва хизматрасонӣ низ саҳми намоёни худро мегузоранд. Бо ибтикори кормандони Агентӣ дар маҳаллаи бинои 76-и кӯчаи Неъмат Қарабоев бунёди маҷмааи варзишӣ-истироҳатӣ ҷараён дорад. Дар сохтмони иншоот бо истифода аз таҷҳизоти муосири шаҳрсозӣ шаклу усулҳои нави сохтмонӣ ва унсурҳои миллӣ ба роҳ монда шудааст. Дар ҷараёни боздид аз маҳаллҳои ободониву бунёдкорӣ таваҷҷуҳи бештар ба масъалаи истифодаи масолеҳи ба шароити иқлими маҳал мутобиқ ва таҷҳизоти варзишиву истироҳатии ҳозиразамон дода шуд.

Азнавсозӣ ва таҷдиди Муассисаи давлатии Боғи “Дӯстии халқҳо”-и ноҳияи Фирдавсии шаҳри Душанберо дар масоҳати 24 гектар Мақомоти иҷроияи маҳаллии ҳокимияти давлатии вилояти Хатлон ба зима гирифтааст. Хар як минтақаи сохтмонии чорбоғ ба шаҳру ноҳияҳои алоҳида вобаста карда шудаанд. Зимни шиносоӣ бо лоиҳаи азнавсозӣ ва ободкории чорбоғ Сарвазири мамлакат таваҷҷуҳи лоиҳакашон ва масъулини корҳои бунёдкориро бо назардошти ҷойгиршавии маҳалли иншоот ва шумораи аҳолӣ дар азнавсозии он ҷалб кард. Таъкид гардид, ки Боғи “Дӯстии халқҳо” яке аз марказҳои калони фарҳангӣ-фароғатии шаҳр ба шумор меравад ва аз ин лиҳоз зимни азнавсозӣ бояд ба бунёди роҳравҳои замонавӣ бо истифода аз масолеҳи сохтмонии ба гармову сармо тобовар, чароғонкунии дохил ва атрофи боғ диққати ҷиддӣ дода шавад.

Ба масъулини корҳои бунёдкориву ободонӣ дастур дода шуд, ки бо дарназардошти имкониятҳои мавҷуда тамоми корҳои марбут ба тарҳрезӣ, лоиҳакашӣ ва ободониву сохтмониро таҳия карда, дар наздиктарин фурсат ба ҳукумати шаҳр пешниҳод намояд.

Масъулини корҳои азнавсозиву ободонии Боғҳои фарҳангӣ-фароғатӣ Сарвазири мамлакат ва роҳбарияти шаҳри Душанберо бовар кунонданд, ки вазифаҳои ба уҳдадоштаашонро то ҷашни Рӯзи Истиқлолият бо сифати баланд иҷро менамоянд.

Бояд гуфт, ки моҳҳои охир, хусусан пас аз интихоби муҳтарам Рустами Эмомалӣ ба сифати раиси шаҳри Душанбе, корҳои созандагиву бунёдкорӣ дар шаҳр вусъати тоза пайдо намуда, дар чанд ҳафтаи охир чандин иншооти муҳими аҳамияти иҷтимоиву фарҳангидошта ба истифода дода шуданд. Рустами Эмомалӣ бахусус барои ҷавонон ғамхории зиёд зоҳир намуда, ҳамарӯза талош доранд, ки дар шаҳр шароити беҳтар барои онҳо фароҳам намоянд. Тасдиқи нақшаи чорабиниҳо ва амалӣ намудани онҳо бахшида ба “Соли ҷавонон”, қабули Барномаи рушди иҷтимоии ҷавонон ва сохта ба истифода додани чандин мактабу маҷмаа ва майдончаву боғҳои истироҳатӣ барои ҷавонони кишвар далели ин гуфтаҳост.

Рустами Эмомалӣ қаблан ҳам ҳамеша барои дастгрии ҷавонони мамлакат кӯшиш мекарданд ва корҳои зиёдро анҷом додаанд. Ҳамчун президенти Федератсияи футболи кишвар фестивалу форумҳо ва чорабиниву мусобиқаҳои варзишии ҷавонони мамлакатро ҳамеша сарпарастӣ менамуданд.