Соли равон Хадамоти алоқаи назди Ҳукумати Ҷумҳурии Тоҷикистон ба 1 ширкати алоқаи барқӣ ҷиҳати дастраснамоии мустақими интернети баландсуръат иҷозатнома супорид.

Дар ин бора имрӯз - 24 июл Аҳлиддин Муртазозода, муовини сардори Хадамоти алоқа зимни нишасти хабарӣ иттилоъ дод.

Муртазозода зимни баргузории нишасти хабарӣ аз он ки мардуми мо то ҳанӯз фарҳанги истифодаи дурусту оқилонаи интернетро наомӯхтааст, изҳори нигаронӣ карда, гуфт “хизматрасонии интернетӣ дар ҷумҳурии мо дар сатҳи баланд қарор дорад ва мардум тарзи истифодаи дурусти онро балад нестанд.

Чунин мавқеъгирии муовини сардори Хадамоти алоқа дар ҳолест, ки ҳамарӯза дар шабакаҳои иҷтимоӣ аз сифати паст ва нархи баланди интернет дар кившар шикоятҳо зиёданд.

Вобаста ба арзон шудани нархҳо ва боло рафтани сифати хизматрасонӣ Аҳлиддин Муртазозода гуфт, масъалаи нарху наво дар мувофиқа бо Хадамоти зиддиинҳисорӣ муайян ва ҷорӣ карда мешавад.

Ёдовар мешавем, ки аз рӯи ҳисобҳои оморӣ дар Ҷумҳурии Тоҷикистон шумораи умумии муштариёни пайвастшуда ба шабакаҳои алоқаи барқӣ 7,8 миллион нафарро ташкил дода, 4,8 миллион адади он муштариёни фаъол мебошанд

Шумора истифодабарандагони интернет дар якҷоягӣ бо истифодабарандагони интернети мобилӣ ва собит 4,18 миллион нафарро дар бар мегирад.