Хуршед Каримзода, сардори Хадамоти гумруки назди Ҳукумати Ҷумҳурии Тоҷикистон имрӯз – 14 феврал зимни нишасти хабарии ниҳоди зери идорааш аз куҳнаву фарсуда будани таҷҳизотҳои ташхисӣ изҳори нигаронӣ кард. Ӯ зикр дошт, ки аз сабаби фарсуда будани таҷҳизот дар самти ошкор кардани ҷиноятҳои гумрукӣ наметавонанд пурра маводҳо - махсусан маводҳои нашъаоварро ошкор кунанд.

- Ҳамин аст, ки дар соли 2023 Хадамоти гумруки назди Ҳукумати Ҷумҳурии Тоҷикистон тавонистааст ҳамагӣ 5 ҳолати гардиш ва интиқоли ғайриқонунии маводи нашъаоварро ошкор намояд, - илова кард сардори Хадамот.

Ба гуфтаи Хуршед Каримзода миқдори умумии маводи ошкоргардида 71 кг. 213 грамро ташкил медиҳад, ки аз инҳо 71 кг. 110 гр героин, 71 гр. хашиш ва 31,5 гр кукнор мебошад.

Рустам ОДИНАЕВ, “ҶТ”