Вазорати кишоварзии Ҷумҳурии Тоҷикистон рӯзи 22 апрел бо пахши як хабарнома дар сомонаи расмии Вазорат иттилоъ дод, ки ба ҳолати 19.04.2024 кишти баҳории зироатҳо тибқи дурнамо ба 64,7% баробар аст.

Тавре дар хабарнома омадааст, дар асоси маълумотҳои Раёсати растанипарварии Вазорат хоҷагиҳои ҷамоавӣ ва деҳқонии ҷумҳурӣ дар майдони 285 ҳазору 29 гектар кишти баҳориро анҷом додаанд, ки ин ба 64,7% нақша ё дурнамо баробар аст.

Ба иттилои масъулин тибқи дурнамо дар мавсими баҳорӣ хоҷагиҳои ҷамоавӣ ва деҳқонии ҷумҳурӣ бояд дар майдони 440 ҳазору 727 гектар кишти баҳории зироатҳоро ба роҳ монанд. Аз ҷумла, дар майдони 84 ҳазору 131 гектар кишти баҳории ғалладонагиҳо, 131 ҳазору 294 гектар зироатҳои техникӣ - пахта 115 ҳазору 655 гектар, 15 ҳазору 415 гектар зироатҳои равғандеҳ, 10 ҳазору 299 гектар полизӣ, 13 ҳазору 770 гектар кишти картошка, 29 ҳазору 509 гектар сабзавот - пиёз 17 ҳазору 459 гектар, сабзӣ 3 ҳазору 874 гектар, карам 1 ҳазору 315 гектар, помидор 3 ҳазору 7 гектар, бодиринг 1 ҳазору 803 гектар ва 3 ҳазору 313 гектар дигар сабзавотҳо ва зироатҳои хӯроки чорво 16 ҳазору 26 гектарро ташкил медиҳад.

Дар ҳамин ҳол, гуфта шудааст, ки то ҳол кишти картошка, ки дар Тоҷикистон ҳамчун нони дуввум ҳисобида мешавад, ба таври бояд иҷро нашудааст. Мувофиқи дурнамо бояд дар майдони 40 ҳазору 70 гектар картошка кишт карда шавад, аммо ба ҳолати имрӯза он ба 13 ҳазору 770 гектар баробар аст, ки 34,4 фоизи нақшаро ташкил медиҳад.

Масъулини вазорат сабаби кам кишт шудани ин навъи маҳсулотро дар номусоидии обу ҳаво дар мавсими нав медонанд.