Соли 2023 ҳиссаи маҳсулоти растанипарварӣ 68,8 фоизи ҳаҷми умумии маҳсулоти кишоварзиро ташкил дод, ки аз он ҳиссаи хоҷагиҳои ҷамоавӣ ва деҳқонӣ 65,3 фоиз ва ҳиссаи хоҷагиҳои аҳолӣ 34,7 фоизро ташкил медиҳад.

Дар ин бора имрӯз зимни нишасти матбуотии Вазорати кишоварзӣ ва Академияи илмҳои кишоварзӣ гуфта шуд.

Тавре Қурбон Ҳакимзода, вазири кишоварзии Ҷумҳурии Тоҷикистон қайд намуд, ҷиҳати рӯёнидани маҳсулоти растанипарварӣ истифодаи самараноки заминҳои таъиноти кишоварзӣ, интихоби кишт ва парвариши зироатҳо дар асоси тавсияҳои илмии олимону мутахассисон ба роҳ монда шуда, дар ҳамаи шаклҳои хоҷагидории ҷумҳурӣ кишти зироатҳои кишоварзӣ дар майдони 861,4 ҳазор гектар гузаронида шудааст, ки нисбат ба соли 2022-юм 1,7 ҳазор гектар ва нисбат ба дурнамои нишондиҳандаҳои соҳа 800 гектар зиёд мебошад.

Аз заминҳои умумии киштшуда зироатҳои ғалладонагӣ - 392,6 ҳазор гектар, зироатҳои техникӣ - 202,6 ҳазор гектар, картошка - 55,5 ҳазор гектар, сабзавот - 73,2 ҳазор гектар, полезӣ - 22,6 ҳазор гектар ва зироатҳои хӯроки чорво - 114,7 ҳазор гектарро ташкил медиҳад.