Сар аз имрӯз, 5-уми январ, сокинони кишвар рӯзона бо барқ таъмин карда мешаванд. Бино ба иттилои ширкати “Барқи тоҷик”, ҳамакнун ба минтақаҳо ба муддати 17 соат нерӯи барқ дода хоҳад шуд.

Нозирҷон Ёдгорӣ, сухангӯи ширкати “Барқи тоҷик” гуфтааст, аз имрӯз дар саросари кишвар сокинон аз соати 5-и субҳ то 22-и шаб бо нерӯи барқ таъмин хоҳанд шуд. То ҳол сокинони минтақаҳои кишвар ба муддати 12 соат - аз соати 5 то 11-и субҳ ва аз 16 то 22 нерӯи барқ дарёфт мекарданд.

Дар ҳамин ҳол, маҳдудияти шабона аз соати 22 то 5 боқӣ мемонад.

Масъулони ширкати “Барқи тоҷик” беҳбуди вазъи таъмини сокинонро бо нерӯи барқ ба мавриди истифода қарор гирифтани Маркази барқу гармидиҳии “Душанбе-2” дар моҳи гузашта рабт доданд. Рӯзи 8 декабри соли гузашта Маркази барқу гармидиҳии “Душанбе-2” бо тавоноии 400 мегаватт ифтитоҳ шуд. Ин марказ метавонад 60 дарсад сокинони Душанберо бо нерӯи барқ ва беш аз 500 бинои пойтахтро бо гармӣ таъмин кунад.