Бино бар иттилои Кумитаи андози назди Ҳукумати Ҷумҳурии Тоҷикистон, дар нуҳ моҳи соли ҷорӣ иҷрои нақшаи андозҳо ва дигар пардохтҳои ҳатмӣ дар ҷумҳурӣ ба андозаи 106,5 фоиз таъмин гардид, ки ба ҷойи 14 миллиарду 102,3 миллион сомонӣ ба буҷети давлатӣ 15 миллиарду 25,3 миллион сомонӣ ворид карда шуд. Ин рақам нисбат ба нишондиҳандаҳои пешбинишуда 923,1 миллион сомонӣ зиёд аст.

Ҳамчунин, тибқи иттилоъ, дар кишвар бо назардошти қабул гардидани буҷетҳои иловагӣ ба маблағи 300,2 миллион сомонӣ вобаста ба барзиёд таъмин шудани он дар ин давра нақшаи аниқшуда ба андозаи 104,3 фоиз таъмин гардид. Ба буҷет нисбат ба нишондиҳандаҳои нақшавӣ 622,8 миллион сомонӣ зиёд ворид шуд.

Гуфта мешавад, ки иҷрои нақшаи аниқшудаи андозҳо ва пардохтҳо дар ин давра, дар Вилояти Мухтори Кӯҳистони Бадахшон ба андозаи 105 фоиз, вилояти Хатлон 102,4 фоиз, вилояти Суғд 103,4 фоиз, шаҳри Душанбе 111,3 фоиз, шаҳру ноҳияҳои тобеи ҷумҳурӣ, дар маҷмуъ 106 фоиз ва Раёсати андози андозсупорандагони калон 83,1 фоиз таъмин шудааст.

Шаҳодат ХОЛОВА, “ҶТ”