Дар нимсолаи якуми соли 2026 Палатаи ҳисоб дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳо 51 чорабинии аудиторӣ гузаронидааст.

Дар ин хусус имрӯз 21 июл, раиси Палатаи ҳисоби Ҷумҳурии Тоҷикистон Каримзода Ҷамшед зимни нишасти матбуотӣ иттилоъ дод.

Ин чорабинии аудиторӣ вайронкунии қоидаҳои молиявиро ба маблағи 336 милион сомонӣ муайян кардааст, ки аз он ба маблағи 202,8 милион сомонӣ ба суратҳисоби КВД БА ҶТ “Амонатбонк”, 117,2 милион сомонӣ ба корхонаҳо, 8,2 милион сомонӣ ба дигар суратҳисобҳои дахлдор ва маблағҳо аз солҳои қаблӣ 76,3 милион сомонии дигар барқарор карда шуд.

Инчунин гуфта шуд, ки аз натиҷаи фаъолияти аудитории Палатаи ҳисоб 27 мавод ба маблағи 212,1 милион сомонӣ барои чораҷӯӣ ва қабули қарорҳои дахлдор ба мақомоти ҳифзи ҳуқуқ ва судӣ ирсол карда шуд.

Бино ба иттилои манбаъ, ҷиҳати бартараф намудани камбудию норасоиҳои молиявӣ ба вазорату идораҳо, корхонаву муассисаҳо ва марказҳои лоиҳаҳои сармоягузорӣ 11 хулоса ва мактубҳои ахборотӣ бо 563 тавсияи судманд ирсол карда шуда, аз баррасии онҳо 16 қарору фармонҳо қабул карда, нисбати 30 нафар ҷазои интизомӣ татбиқ карда шуд.

Шаҳноза АЗИМОВА, “ҶТ”