Парвози ҳавопаймоҳо миёни Тошканду Душанбе аз моҳи январи соли 2017 оғоз меёбад. Дар ин бора рӯзи 30 ноябр миёни ҳайатҳои Тоҷикистон ва Ӯзбекистон санади ҳамкорӣ имзо шуд.

Шералӣ Ганҷалзода, вазири нақлиёти Тоҷикистон гуфт, парвозҳоро аз ҷониби Тоҷикистон ширкати ҳавопаймоии "Сомон Эйр" ва аз тарафи Ӯзбекистон "Ӯзбекистон ҳаво Йуллари" дар як ҳафта ду бор анҷом медиҳанд.

Ба гуфтаи Ҷамила Ҳусейнова, сухангӯи Фурудгоҳи байналмилалии Душанбе, ҳайати Ӯзбекистон рӯзи чоршанбе аз фурудгоҳ ва терминали байналмилалӣ дидан карда, барои ҳамкорӣ дар гуселу қабули мусофирон бо фурудгоҳ тавофуқ карданд.

Парвозҳо миёни шаҳрҳои Ӯзбекистону Тоҷикистон, аз ҷумла дар масири Тошканд – Душанбе соли 1992 қатъ шуда буданд.