Мақомоти Фурудгоҳи байналмилалии Душанбе гуфт, ки баъди камтар аз ду ҳафтаи дигар парвози ҳавопаймоҳо байни пойтахти Тоҷикистон ва Ӯзбекистон шуруъ мешавад.

Парвозҳоро дар масири Тошканд-Душанбе ва Душанбе-Тошканд ширкати ҳавопаймоии "Сомон Эйр" ва "Ӯзбекистон ҳаво йуллари" ҳафтае ду маротиба анҷом медиҳанд. Бино ба иттилои сухнгӯи Фурудгоҳи байналмилалии Душанбе Ҷамила Ҳусейнова, фурӯши билетҳо аллакай оғоз шудааст.

Дар пайи оғози ҷанги шаҳрвандӣ дар Тоҷикистон дар соли 1992 парвозҳо миёни Тоҷикистону Ӯзбекистон қатъ шуд. Пеш аз ин солҳо Душанбе бо шаҳрҳои Тошканд, Самарқанд, Бухоро, Намангон, Андиҷон ва Қӯқанд иртиботи ҳавоӣ дошт ва ҳафтае даҳҳо парвоз миёни шаҳрҳои Тоҷикистону Ӯзбекистон анҷом мешуд.

Пешниҳоди аз сар гирифтани парвозҳо миёни ду кишвар аз соли 2014 ба ин сӯ борҳо баррасӣ шуда буд. Аммо созиши воқеӣ 30 ноябри соли гузашта дар гуфтугӯи ҳайатҳои Тоҷикистону Ӯзбекистон дар шаҳри Душанбе ҳосил гашт.