Шералӣ Ганҷалзода, вазири нақлиёти кишвар, 1-уми август, зимни нишасти матбуотӣ бо хушҳолӣ зикр кард, ки  дар нимсолаи аввали соли равон аз ҳисоби ширкатҳо ва соҳибкорони ватанӣ ба маблағи 1218,4 ҳазор сомонӣ корҳои роҳсозӣ иҷро шуданд.

Ба гуфтаи вазир, аз ҷумла 1086,9 ҳазор сомонӣ барои шағалпӯш намудани 172,5 километр роҳ ва 131,5 ҳазор сомонӣ барои таъмири 6 купрӯк бо дарозии 38 метр ба истифода шудаанд.
    
Қайд гардид, ки аз ҳисоби маблағҳои буҷети ҷумҳурӣ барои нигоҳдории 14146 километр роҳи автобилгард дар ҳаҷми 24483,3 ҳазор сомонӣ корҳо иҷро гардиданд. Аз ин барои таъмири ҷоррии 3647,0 километр роҳ, таъмири асосии 30,7 километр роҳ, таъмири миёнаи 148,3 километр роҳ, таъмири 62473 метри квадратии чуқурчаҳо, таъмири азнавсозии 52 пул бо дарозии 1399 метр, азнавсозии 105 қубур бо дарозии 851 метр сарф шуд. Аз ҳисоби мақомотҳои иҷроияи маҳаллии ҳокимияти давлатии шаҳру ноҳияҳо низ барои нигоҳдории роҳҳо 4139,1 ҳазор сомонӣ ҷудо гардид.

Дар маҷмӯъ 30,7 километр роҳ таъмири асосӣ, 148,3 километр таъмири миёна, 4045,0 километр таъмири ҷорӣ ва 172,5 километр роҳ шағалпӯш шуданд. Инчунин, таъмиру азнавсозии 76 пул бо дарозии 2306 метр ва таъмиру азнавсозии 112 қубур бо дарозии 875 метр, 15539 бех ниҳол шинонида шуда, дигар корҳои марбут бо маблағи умумии 29840,8 ҳазор сомонӣ иҷро гардиданд.