Як гурӯҳи соҳибкорон ва мутахассисони соҳаи саноати сабуки Русия аз 18-ум то 23-уми апрел бо ҳадафи шиносоӣ бо корхонаҳои нассоҷиву дӯзандагии кишвар ва баррасии масоили ҳамкорӣ аз Тоҷикистон дидан мекунад.

Сафари мазкур дар чаҳорчӯбаи лоиҳаи Маркази тиҷорати байналмилалӣ (МТБ) ва дар ҳамкорӣ бо ширкати таҳиякунандаи намоишгоҳҳо - “Текстилэкспо” ва оҷонси хабарии “РИА Мода” баргузор мегардад.

Ба ҳайати мазкур соҳибони корхонаҳо, ки ба хариди риштаи пахтагин, матои трикотажӣ ва маҳсулоти дигари нассоҷиву дӯзандагӣ таваҷҷуҳ доранд, намояндагони ширкатҳои хариди яклухт ва шабакаҳои тиҷоратӣ, ки ба аутсорсинги истеҳсолӣ алоқаманданд, намояндагони ширкатҳои фурӯши таҷҳизоти нассоҷӣ ва намояндагони ширкати “Текстилэкспо” ва оҷонси хабарии “РИА Мода” шомиланд.

Барномаи сафар аз Хуҷанд шуруъ шуда, ҳайати Русия бо корхонаҳои «Нассоҷи Хуҷанд», «Ортекс», «Раҳимов А. А.», «Лидер», «РБТ Тоҷикистон» ва «Фирӯз» шинос мешавад. Меҳмонон, ҳамчунин, дар Истаравшан аз «Ноҳид», дар Мастчоҳ аз «Олим Текстайл», дар Ёвон аз «ХИМА-Текстил» ва «Ваҳдат» ва дар шаҳри Душанбе аз «Нафиса», «Гулистон», «Ёқут-2000» дидан карда, бо рафти истеҳсолот ва шароити корӣ дар корхонаҳо шинос мешаванд. Ҳамчунин, мулоқот бо намояндагони вазоратҳои марбута ва ММИҲД дар вилояти Суғд дар назар буда, 22 апрел вохӯрии васеи кории намояндагони соҳаи нассоҷӣ ва дӯзандагии Русия ва Тоҷикистон дар шаҳри Душанбе ба нақша гирифта шудааст.