Аз рӯи маълумоти омор имрӯз дар мамлакат қариб 170 000 хоҷагиҳои деҳқонию фермерӣ фаъолият мекунад. Лекин на ҳама сарварони хоҷагиҳо маълумоти кишоварзӣ доранд. Ин дар ҳолест ки ҳар сол қариб 1100 нафар мутахассиси ҷавон Донишгоҳи аграрии Тоҷикистонро хатм менамоянд.

Сеюми майи соли равон дар донишгоҳи мазкур семинар-машварати “Хатмкардагони ДАТ: дониш ва маҳорати зарурии мутахассисони соҳаи кишоварзӣ дар замони муосир” баргузор гардид. Дар он мутахассисони Вазорати кишоварзии ҷумҳурӣ, Вазорати молияи ҷумҳурӣ, бонкҳои давлатию тиҷоратӣ, муассисаи давлатии "Рушди соҳибкорӣ дар соҳаи кишоварзӣ", олимони Академияи илмҳои кишоварзии Тоҷикистон, роҳбарони хоҷагиҳои пешқадам, корхонаҳо ва ҳайати профессорону омӯзгорони донишгоҳ ширкат намуданд.

Ноиби ректор оид ба таълими ДАТ ба номи Ш. Шоҳтемур, профессор Усмон Маҳмадёров дар бораи саҳми донишгоҳи мазкур дар омода намудани мутахассисони соҳаи аграрӣ маълумот дода гуфт, ки тӯли 85 соли фаъолият, ДАТ-ро 47 000 мутахассис хатм намудаанд. Танҳо дар 25 соли соҳибистиқлолӣ донишгоҳро 31 000 мутахассис хатм карданд, ки 66% миқдори умумии дастпарваронро ташкил медиҳад.  

Мудири лабараторияи биотехнологии АИК, профессор Қурбон Алиев пешниҳод намуд, ки минбаъд дар такмили самтҳои биотехнология ва биоагрономия бештар таваҷҷуҳ карда шавад. Зеро ҷорӣ кардани таълими илмҳои мазкур ба зудтар ноил гаштан ба амнияти озуқаворӣ мусоидат мекунад.

Дастпарвари донишгоҳи мазкур, раиси Комиҷроияи ҲХДТ ноҳияи Сино Наъсулло Назаров пешниҳод намуд, ки амалисозии “Лоиҳаи тиҷораткунонии соҳаи кишоварзӣ” бояд ҳатман дар ҳамкорӣ бо ДАТ сурат бигирад. Иштирокчиёни семинар пешниҳод намуданд, ки чунин семинарҳо ҳамасола дар пойгоҳи ДАТ ба номи Ш. Шоҳтемур гузаронида шавад. Ректори ДАТ Амонулло Салимов ба иштирокчиёни семинар барои маслиҳату пешниҳодоташон изҳори сипос намуда, иброз дошт, ки роҳбарияти донишгоҳ баҳри баланд бардоштани маҳорати касбии мутахассисони соҳаи кишоварзӣ пайваста кӯшиш хоҳад кард.

Алишери САЙФИДДИН