Дар ноҳияи Қубодиён маркази омӯзишии дӯзандагӣ аз тарафи Ассотсиатсияи миллии занҳои соҳибкори Тоҷикистон дар доираи Лоиҳаи «Соҳибкории бонувон воситаи васеъ намудани ҳуқуқ ва имкониятҳои занон» бо маблағгузории Оҷонсии ИМА оид ба рушди байналмилалӣ (USAID) ифтитоҳ ёфт.

Дар кушодашавии маркази омӯзишӣ муовини раиси вилояти Хатлон Махфират Хидирзода, раиси ноҳияи Қубодиён Файзуллозода Зафар, Сафири ИМА дар Тоҷикистон хонум Элизабет Миллард ва дигар шахсони расмӣ иштирок доштанд.

Элизабет Миллард дар баромади худ ин иқдомро нек арзёбӣ намуда, онро дар ҳунаромӯзию беҳтар гардидани вазъи иқтисодии бонувон муҳим арзёбӣ намуд.

Сипас, Махфират Хидирзода кушодашавии Маркази омӯзишии дӯзандагиро саривақтӣ хонда, арзи сипоси худро ба шарикони рушд ва АМЗСТ баён намуд.

Гуфта шуд, ки Маркази омӯзишии дӯзандагӣ бо мақсади ҷалби занону духтарон ба касбомӯзии ройгон ва ба ин васила дастгирӣ намудани онҳо дар оғоз ва рушди соҳибкории занона равона гардидааст. Дар ин макон 10 нафар дӯзанда бо кори доимӣ таъмин шуда, дар як сол тақрибан ба 150 нафар бонувон омӯзиш медиҳанд.

Умед Мирзоев, "ҶТ"