Дар нимсолаи якуми соли ҷорӣ воридоти мол ба ҷумҳурӣ 2736,4 млн. доллари амрикоиро ташкил додааст, ки нисбат ба ҳамин давраи соли гузашта 438,4 млн. доллар зиёд мебошад.

Дар ин бора Ашурбой Солеҳзода, муовини вазири рушди иқтисод ва савдои Ҷумҳурии Тоҷикистон 10 август зимни нишасти матбуотӣ ба рӯзноманигорон иттилоъ дод.

Муовини вазир дар идома таъкид намуд: “Дар ин давра асосан ҳаҷми воридоти гандум, маҳсулоти нафтӣ, гази моеъ, таҷҳизоти технологӣ, мошинҳои барқӣ ва таҷҳизот, воситаҳои парвозкунанда, чӯбу тахта ва маҳсулоти он, шумораи воситаҳои нақлиёти заминӣ ва ғайраҳо зиёд гардид”.

Ҳамзамон, аз коҳиш ёфтани ҳаҷми содироти маҳсулоти ватанӣ дар шаш моҳи соли ҷорӣ изҳори нигаронӣ карда шуд. “Содирот дар ин давра 678,6 млн. долларро ташкил намуд, ки нисбат ба ҳамин давраи соли гузашта 44,2 фоиз ё 536 млн. доллар кам аст. Омилҳои коҳиш ёфтани содирот, аз ҳисоби кам содир гаштани металҳои қиматбаҳо, маъданҳо, нахи пахта ва алюминийи аввалия мебошад”, - гуфт муовини вазир.