Дар шароити имрӯзаи пешрафти саноат яке аз соҳаҳои муҳими иқтисоди миллӣ маҳсуб ёфта, таъмин намудани рушди босуръати он аз вазифаҳои афзалиятноки Ҳукумати Тоҷикистон мебошад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни мулоқоти хеш бо кормандони соҳаи саноати кишвар таъкид намуданд, ки бо дарназардошти ҳадафи саноатикунонии кишвар баррасии масъалаҳои ҳалталаби соҳа ва дарёфти роҳҳои рушди он тавассути воридоти технологияҳои инноватсионӣ, истеҳсоли маҳсулоти рақобатпазир, тақвияти иқтидори содиротии мамлакат ва таъсиси ҷойҳои нави корӣ тадбирҳои мушаххас андешида мешаванд. Ҳадафи чоруми умумимиллӣ эълон намудани саноатикунонии мамлакат имкон медиҳад, ки Тоҷикистон дар давраи миёнамуҳлат аз кишвари аграриву саноатӣ ба кишвари саноативу аграрӣ табдил ёбад.

МУҲАРРИКИ ИҚТИСОДИ МИЛЛӢ

Боиси хушнудист, ки дар Тоҷикистон сол то сол шумораи корхонаҳои истеҳсолии ватанӣ меафзояд. Яке аз чунин корхонаҳо Ҷамъияти саҳомии пӯшидаи “Зиркон” мебошад, ки аз калонтарин коргоҳҳои истеҳсоли сангҳои ороишӣ дар кишвар ба шумор меравад. Санги асоси корхона соли 2018 гузошта шудааст. 17-уми сентябри соли 2019 Пешвои миллат муҳтарам Эмомалӣ Раҳмон ба корхона ташриф оварда, бо бардоштани парда аз рӯи лавҳаи рамзӣ ба фаъолияти корхонаи коркарди санг дар Тоҷикистон оғози расмӣ бахшиданд. Ин корхона бо харҷи 55 миллион сомонӣ аз ҳисоби сармояи мустақим бунёд шудааст.

Роҳбари ҶСП “Зиркон”, ки мутахассиси соҳаи кӯҳкорӣ буда, дар ин соҳа таҷрибаи зиёд дорад, зимни суҳбат аз иқдомоти Пешвои миллат доир ба ҳадафи чоруми стратегӣ эълон намудани саноатикунони кишвар ва рушди бемайлони иқтисоди миллӣ изҳори қаноатмандӣ намуда, гуфт, ки кишвари мо дорои захираҳои бойи канданиҳои фоиданок ва сангҳои ороишии гаронарзиш мебошад, ки дар сурати коркарду истихроҷи онҳо Тоҷикистон метавонад даромади хуб ба даст оварда, ба рушди иқтисоди миллӣ такони ҷиддӣ бахшад.

- Сангҳои ороишие, ки имрӯз корхонаи мо истеҳсол мекунад, солҳои аввал аз хориҷи кишвар воридот мешуд. Мақсади асосии таъсис додани чунин як коргоҳи бузург ин коҳиш додани воридоти мол аз хориҷ ва таъмини бозори истеъмолии мамлакат бо маҳсулоти хушсифати ватанӣ ва ба ин васила зиёд намудани ҷойҳои кории нав буд. Бо ин мақсад нахуст мо конҳои ватани худро ба кор даровардем. Айни ҳол 5 адад чунин конҳо пурра фаъолият намуда истодааст, ки онҳо дар ноҳияҳои Шаҳритус, Деваштич, деҳаи Дараи Рӯдакӣ, Харангон ва Ванҷ воқеъ мебошанд. Сангҳое, ки дар конҳои мо вуҷуд доранд, хеле камназир буда, дар баъзе кишварҳои мутараққӣ истихроҷ мешаванд. Сангҳои ороишии мо имрӯз намои аксар биноҳои маъмурию маишии пойтахти кишварро зеб медиҳанд”, - гуфт роҳбари корхона.

САНОАТИ КОРКАРД – САМТИ АФЗАЛИЯТНОКИ СОҲА

Дар ҶСП “Зиркон” коркарди сангҳои гуногун, аз қабили санги мармар, хоро ва оҳаксанг ба роҳ монда шуда, он аз 6 хати истеҳсолии муҷаҳҳаз бо техникаву таҷҳизот ва дастгоҳҳои муосир иборат мебошад. Корхона дар як сол зиёда аз 180 ҳазор метри мураббаъ сангро дар шаклҳои гуногун бо сифати баланд коркард менамояд. Тавре Пешвои миллат қайд кардаанд: “Имрӯз 85 фоизи корхонаҳо, 60 фоизи маҳсулот ва беш аз 70 фоизи кормандони соҳаи саноати кишвар ба саноати коркард рост меояд”

Воқеан, саноати коркард соҳаест, ки дар сурати дуруст ба роҳ мондани стратегияи истеҳсолӣ ва содиротӣ арзиши иловашудаи нисбатан баландро тавлид мекунад. Ин бошад, ба афзоиши маҷмӯи маҳсулоти дохилӣ, таъсиси ҷойҳои кории доимӣ ва баланд бардоштани сатҳи зиндагии аҳолӣ мусоидат менамояд.
Дар ҶСП “Зиркон” коркард ва истеҳсоли маҳсулот аз санг бо андоза ва намудҳои гуногун ба роҳ монда шудааст. Барои буридани тахтасангҳои андозаашон гуногун таҷҳизотҳои махсус мавҷуд аст, ки дар кишвар назир надоранд. Дар ин ҷо корҳои суфтакунию сайқалдиҳии санг, молидани ширеш ва хушк кардани он, андозагириву буридани маҳсулот, сутуну дастпояҳо, шаклгириву андозагирӣ ҳангоми коркарди сангҳо, насби симтӯрҳо дар пушти санг, тарошидани дилхоҳ шакли меъморӣ ва кандакории сутунҳо дар корхона тавассути дастгоҳҳо ба таври автоматӣ иҷро мешавад.

“Имрӯз истеҳсолоти корхона нисбати солҳои 2019-2020 беҳтар ба роҳ монда шудааст. Иқтидори истеҳсолии корхона дар як сол 180 ҳазор метри мураббаъ сангро дар бар мегирад.

САФИ МУТАХАССИСОНИ СОҲАВӢ МЕАФЗОЯД

Айни ҳол шумораи кормандони коргоҳ беш аз 80 нафар буда, мутахассисони маҳаллӣ бо ҷои кори доимӣ ва маоши хуб таъминанд. Барои кормандон шароити хуби кору истироҳат фароҳам оварда шудааст. Вобаста ба омодасозии мутахассисони маҳаллӣ, муҳайё намудани шароити моддию маишии кормандон роҳбари корхона чунин ибрози ақида намуд: “Соли аввали таъсисёбии корхона аз нарасидани мутахассисони соҳавӣ танқисӣ мекашидем. Баъдан мо курсҳои кӯтоҳмуддати омӯзишӣ ташкил карда, ҷавононро ба кор ҷалб кардем ва айни ҳол мутахассисони маҳаллӣ фаъолият доранд. Кормандон бо хӯроки гарм, ҳаммом ва ҷои хоб, ҳамчунин бо сарулибоси кории мавсимӣ таъмин карда мешаванд.”

ОРОИШ ДАР РӮИ САНГ БО ТАҶҲИЗОТИ ҶАДИД

Дар коргоҳ бо истифодаи зиёда аз 20 намуд санг 50 намуд маҳсулот истеҳсол менамоянд. Аз ҷумла, сангҳои ороишӣ, лавҳаҳои мармарӣ, фаввораҳо, сутунчаҳои нақшин, сафолакҳои сангин, зинаҳо, зерпоя, сабадҳои ҳархела, лавҳи хӯрокпазӣ, зертахтаҳои тиреза, ҳайкалҳо, шипангчаҳо, оташдонҳо, сутунҳои калонҳаҷми гуногуншакл, бо нақшу нигори миллӣ ва ғайраҳо.

Дар маҷмӯъ, дар ин коргоҳи истеҳсолӣ зиёда аз 40 номгӯи дастгоҳу таҷҳизоти муосир васлу насб гардидаанд, ки бо барномаи рақамӣ идора мешаванд.
То имрӯз дар кишвар чунин технология танҳо барои ороиш дар рӯйи чӯбу тахта мавҷуд буд. Инак, бо таъсиси ин корхона бо истифода аз техникаву технологияи баландсифати замонавӣ ороиш дар рӯи санг низ имконпазир гардидааст, ки талаботи бозори масолеҳи сохтмониро қонеъ гардонда метавонад.
Бештари техникаҳои насбшуда ҳангоми буриш ва ороиши санг бо об кор мекунанд. Бо назардошти ин дар корхона пойгоҳи махсуси обрасонӣ бо ғунҷоиши 1200 метри мукааб сохта шудааст, ки баъд аз полоиш тавассути насосҳо об гардиш хӯрда, дубора ба дастгоҳҳо интиқол дода мешавад.

“СОДИРОТИ МОЛРО ЗИЁД МЕКУНЕМ”

Маҳсулоти корхона аз ҷиҳати сифати рангу ороиш бо истеҳсолоти кишварҳои мутараққии ҷаҳон, ба монанди Италия, Финляндия, Чин, Россия, Ҳиндустон ва дигарҳо рақобатпазир аст. ҶСП “Зиркон” аллакай ба Ҳиндустон, Чин ва Қатар мол содирот мекунад.

Корхона нақша дорад, ки дар оянда молҳои хушсифату ҷавобгӯ ба талаботи бозори ҷаҳониро истеҳсол намуда, ба кишварҳои дигари минтақа ва ҷаҳон, аз ҷумла Италия содироти молро ба роҳ монад.

P/S: Хонандагони азиз! Шакли видеоии маводро аз ютубканали рӯзнома – javonontv тамошо карда метавонед.