НАВРӮЗИ АҶАМ
Омад ба ҷаҳон
Наврӯзи Аҷам.
Бар боғ расид
Мардум пайи ҳам.

Мардум бари ҳам қатор гаштанд,
Рухсора гули анор гаштанд.
Хурсанд, ба лаб шарориханда
Аз омадани баҳор гаштанд.

Омад ба ҷаҳон
Наврӯзи Аҷам.
Бар боғ расид
Мардум пайи ҳам.

Аз сардии дай фирор карданд,
Аз рӯзи нав ифтихор карданд.
Дар як сари суфра панҷ рӯзе
Парҳез зи кору бор карданд.

Омад ба ҷаҳон
Наврӯзи Аҷам.
Бар боғ расид
Мардум пайи ҳам.

Мардум ҳама чун баҳорбишкуфт,
Чун лола ба марғзор бишкуфт.
Бо ғамза ба зери пои мардум
Бобунаи садҳазор бишкуфт.

Омад ба ҷаҳон
Наврӯзи Аҷам.
Бар боғ расид
Мардум пайи ҳам.

ОТАШПАРАК
Эй оташи навсӯхта,
Дар рӯзи ид афрӯхта.
Хушҳол бо фармони дил
Кас дида сӯят дӯхта.

Зан шуълаву лабханд кун,
Бишкастаро пайванд кун.
Бемору пири хастаро
Қувват бидеҳ, хурсанд кун.

Ҷамъем дар паҳлӯи ту,
Дилгарму ҳам дилҷӯи ту.
Аз ин тараф то он тараф
Мо мепарем аз рӯи ту.

Аз ғам раҳо кун ҷони мо,
Мон, бишканад армони мо.
Зардӣ бубар, сурхӣ бубахш
Бар қалби пуртуғёни мо.

НАВРӮЗИ ҶАҲОНӢ
(Cеқисма)
1.
Наврӯз ҷаҳонист,
Наврӯз ҷаҳонист.
Дар кишвари тоҷик
Амн асту амонист.
Наврӯз ҷаҳонист,
Наврӯз ҷаҳонист.

Гулзор пур аз гул,
Аз лолаву сунбул.
Гулдухтаракон, гул
Бандед ба кокул,
Бандед ба кокул.

Наврӯз ҷаҳонист,
Наврӯз ҷаҳонист.
Дар кишвари тоҷик
Амн асту амонист.
Наврӯз ҷаҳонист,
Наврӯз ҷаҳонист.
2.
Мо миллати озодем,
Мо халқи Худододем.
Бо шамсу қамар пайванд
Дар кишвари ободем,
Дар кишвари ободем.

Дил соғари борон аст,
Боронаки найсон аст.
Хезед ба дидораш,
Наврӯзи гулафшон аст,
Наврӯзи гулафшон аст.
Мо миллати озодем,

Мо халқи Худододем.
Бо шамсу қамар пайванд
Дар кишвари ободем,
Дар кишвари ободем.

3.
Тоҷикистони ҷавон, эй Ватанам,
Мулки Наврӯзи ҷаҳон, эй Ватанам.
Мо чи сон дар қадамат сар наниҳем,
Дилситон, қиблаи ҷон, эй Ватанам.

Ҳама Наврӯз, ҳама гулназар аст,
Ҳама кас гул ба бару гул ба сар аст.
Хез, биштоб ба майдони ҳунар,
Умр чун рӯди равон даргузар аст.

Тоҷикистони ҷавон, эй Ватанам,
Мулки Наврӯзи ҷаҳон, эй Ватанам.
Мо чи сон дар қадамат сар наниҳем,
Дилситон, қиблаи ҷон, эй Ватанам.

ПАЗИРОӢ
Пеш аз қабули Наврӯз
Мо кори беш кардем.
Ғамро зи маъбади дил
Рақсида, пеш кардем.
Густурда хони пурноз
Дар рӯи фарши хона.
Бо сад ҳазор уммед,
Бо чангу бо чағона.
Бикшода дар, ба Наврӯз
Гуфтем;- ҷон фидоят.
Мо халқи Тоҷикистон
Ҳастем ошноят.

Дар куртааш нагунҷид
Наврӯзи чеҳрахандон.
Пар боз карда, пар зад
Дар зери чархи гардон.

Парвоз карда, гардид
Наврӯзи мо ҷаҳонӣ.
Шукронаи Худованд,
Шукронаи амонӣ.

НАВРӮЗ ҶАҲОНИСТ
Наврӯзи мо ҷаҳонист,
Меҳр асту меҳрабонист.
Сер аз рухаш нагардем,
Майлаш ба шодмонист.

Аз хоби ноз бедор,
Дил дар талоши дидор,
Монем по саҳаргоҳ
Гулзор то ба гулзор.

Булбул ба дашту ёла,
Оварда рӯ ба нола.
Гӯяд ба гӯши соқӣ
Ку ҷому ку пиёла?

Дар боғҳо чу кафтар
Якчанд села духтар,
Хонанд шеъри ишқӣ,
Бо кокулони пар-пар.

Бахшад зи ғӯза борон
Чашме ба обшорон.
Оянд, агар вазад бод,
Дар рақс шохсор

НАВРӮЗИ ТОҶИКИСТОН
Наврӯз, марав зи
Тоҷикистон умре,
Аз кишвари сабзи
гулбадомон умре.
Бигзор қадам ба кӯи ишқ,
эй Наврӯз,
Бо мардуми шоди
чеҳрахандон умре.

Хушҳол кашам нафас,
ҳавоят, Наврӯз,
Дар тоқи баланди дида ҷоят, Наврӯз.
Табрик ба ту, ки сайр дорӣ дар боғ,
Дорад ҳама кас ба тан қабоят, Наврӯз.

Сурх асту сафеду сабз рӯят, рӯят,
То хам-хами по дароз мӯят, мӯят.
Наврӯз-нигори ҳафт пуштат ошиқ,
Аз пуштаву боғу роғ ояд бӯят.

НУРУЛЛОҲИ ОРИФ, “ҶТ”