Дирӯз-16 май дар толори маҷлисгоҳи Академияи идоракунии давлатии назди Президенти Ҷумҳурии Тоҷикистон маросими ҳавасмандгардонии ғолибон ва супоридани ҷоизаҳои озмуни илмӣ - зеҳнии “Маърифати ҳуқуқӣ ва рушди ҳуқуқҳои кӯдак” доир гардид.

Дар чорабинии мазкур Даврон Сафарзод, ректори Академияи идоракунии давлатии назди Президенти Ҷумҳурии Тоҷикистон, ҳайати доварони озмун, иштирокчиён ва донишҷӯён ширкат намуданд.

Даврон Сафарзод зимни баромади худ иброз дошт, ки баргузории чунин озмуни сатҳи баланд ва таваҷҷуҳи доираи муҳаққиқони ҷавону донишҷӯён моро ба ояндаи дурахшони илми ҳуқуқшиносии миллӣ умедвор менамояд.

Бояд гуфт, ки озмуни мазкур бо мақсади баланд бардоштани сатҳи маърифати ҳуқуқии донишҷӯён, тарғиби арзишҳои демократӣ, мустаҳкам намудани институти ҳуқуқи инсон ва муносибати эҳтиромона бо он, тарбияи шаҳрвандон дар руҳияи эҳтиром нисбат ба қонун ва таъмин намудани волоияти қонун, рушди тафаккури илмӣ ва тарғиби ҷаҳонбинии илмии донишҷӯён, ҷалби таваҷҷуҳи донишҷӯён ба масъалаи риояи ҳуқуқҳои кӯдак, дарёфт, рушд ва ҳавасманднамоии донишҷӯёни болаёқат, ташаккули тафаккури мантиқӣ ва рушди қобилияти зеҳнии донишҷӯён, баланд бардоштани шавқу ҳаваси донишҷӯён ба омӯзиши фанҳои ҳуқуқӣ ва шиносоии бештари онҳо бо дастовардҳои навини илми ҳуқуқшиносии муосир роҳандозӣ гардид.

Ҳамин тавр, ғолибон ва ҷоизадорони озмуни илмӣ - зеҳнии “Маърифати ҳуқуқӣ ва рушди ҳуқуқҳои кӯдак” ба таври зайл муайян шуданд:

Бахши рақобатҳои даставӣ:
1. Дастаи “Волоияти қонун”-и Донишгоҳи миллии Тоҷикистон (ҷоиза – 5000 сомонӣ);
2. Дастаи “Ворисони Куруши Кабир”-и Академияи идоракунии давлатии назди Президенти Ҷумҳурии Тоҷикистон (ҷоиза – 5000 сомонӣ);
3. Дастаи “Дониш”-и Академияи Вазорати корҳои дохилии Ҷумҳурии Тоҷикистон (ҷоиза – 5000 сомонӣ).

Бахши таҳияи навори видеоӣ (видеоролик) дар мавзуи “Ҳифзи ҳуқуқҳои кӯдак” :
Номинатсияи “Навори видеоии пурмазмун” – Раҳматзода Шоҳрух (ҷоиза – 3000 сомонӣ);
Номинатсияи “Иҷроиши визуалӣ-аниматсионӣ” – Қузратуллозода Шукрона (ҷоиза – 3000 сомонӣ);
Номинатсияи “Маҳорати актиёрӣ” – Кенҷаев Тоҳирҷон (ҷоиза – 3000 сомонӣ).

Бахши навиштани эссе дар мавзӯи “Мусоидат барои татбиқ накардани адолати судии ҷиноятӣ нисбат ба ноболиғоне, ки кирдорҳои начандон вазнин содир кардаанд”:
Ғолиби номинатсияи “Эссеи пурмазмун” – Ҳалимова Мадина (ҷоиза – 1000 сомонӣ);
Ғолиби номинатсияи “Таҳлили механизмҳои ҳуқуқӣ” – Каримова Рисолат (ҷоиза – 1000 сомонӣ);
Ғолиби номинатсияи “Ташаббускорӣ ва пешниҳодот” – Неъматзода Шаҳбоз (ҷоиза – 1000 сомонӣ).

Ёдовар мешавем, ки озмуни мазкур бо мақсади амалисозии Фармони Президенти Ҷумҳурии Тоҷикистон “Дар бораи “Соли маърифати ҳуқуқӣ” эълон намудани соли 2024” бо ташаббуси Академияи идоракунии давлатии назди Президенти Ҷумҳурии Тоҷикистон дар ҳамкорӣ бо намояндагии ЮНИСЕФ дар Тоҷикистон ва маблағгузории Дафтари ҳамкориҳои Швейтсария дар Тоҷикистон миёни донишҷӯёни муассисаҳои таҳсилоти олии касбии шаҳри Душанбе гузаронида шуд.

Гулафшон КАРИМОВА,“ҶТ”