Донишгоҳи славянии Русияву Тоҷикистон бо донишгоҳҳои бонуфузи Русия, ИДМ ва кишварҳои аврупоӣ беш аз 180 шартнома ва қарордод бастааст. Дар ин бора Файзулло Машраб Қурбоналӣ, ректори донишгоҳи мазкур зимни нишасти матбуотӣ иттилоъ дод.

“Солҳои 2021-2022 бо донишгоҳҳои Федератсияи Русия, Узбекистон, Чин ва Қазоқистон 10 шартнома ба имзо расид”, - гуфт номбурда.

Гуфта шуд, ки соли таҳсили 2022-2023 шумораи умумии шаҳрвандони хориҷие, ки дар ДСРТ таҳсил мекунанд, 288 нафарро ташкил медиҳад. Ин шаҳрвандон аз кишварҳои Озарбойҷон, Афғонистон, Қазоқистон, Қирғизистон, Чин, Полша, Ҷумҳурии Корея, Русия, Туркманистон, Узбекистон ва Украина мебошанд.

Ҳ. РАҲМАТУЛЛОЕВ, "ҶТ"