Донишгоҳи давлатии ҳуқуқ, бизнес ва сиёсати Тоҷикистон бо 240 ташкилоту муассиса шартномаи ҳамкорӣ дорад, ки 47 шартнома дар давраи ҳисоботӣ ба имзо расидааст. Дар ин бора ректори Донишгоҳ Шероз Мӯминзода зимни нишасти матбуотӣ ба рӯзноманигорон хабар дод.

Гуфта шуд, ки бо мақсади ҷорӣ намудани таҳсилоти дуалӣ ва тақвияти робитаи илм бо истеҳсолот дар назди корхонаю муассисаҳои ҳамкор 31 маркази рушди касбияти кафедраҳо таъсис дода шудааст. Ин марказҳо барои гузаронидани машғулиятҳои амалӣ, шиносоӣ бо технология ва низоми идоракунии истеҳсолот, ҷалби мутахасисони соҳа ба раванди таълим, муосидат ба шуғли хатмкунандагон ва ба таҷрибаомӯзии истеҳсоливу пешаздипломӣ сафарбар намудани донишҷӯён мусоидат менамояд.

Ректори Донишгоҳ вобаста ба масъалаи омӯзиши забонҳои хориҷӣ таваҷҷуҳ намуда, иттилоъ дод, ки дар Маркази омӯзиши забонҳои хориҷӣ 306 нафар ба омӯзиши забонҳои англисӣ, кореягӣ, хитоӣ, фаронсавӣ, олмонӣ ва русӣ ҷалб гардида, 216 нафар дар курсҳои тайёрӣ таҳсил намудаанд.

Ҳамчунин, маълумот дода шуд, ки нақшаи қабули донишҷӯён дар соли таҳсили 2026-2027, ки 2855 нафарро ташкил медиҳад, бо назардошти давраи асосӣ 97,3 фоиз иҷро шудааст. Ин дастовард натиҷаи дуруст ба роҳ мондани корҳои тарғиботиву ташвиқотӣ ва ташкилу баргузории озмуни “Хатмкунандаи беҳтарин”, “Ҳафтаи дарҳои кушод” ва интернет-олимпиада арзёбӣ карда мешавад.

С. ҚОДИРОВ, “ҶТ”