27 июл ректори Донишкадаи давлатии фарҳанг ва санъати Тоҷикистон ба номи Мирзо Турсунзода гуфт, соли 2020 донишкадаро 7 нафар бо дипломи аъло хатм кардаанд, ки ин нишондиҳанда нисбати соли гузашта 1 адад кам аст.

Сабаби кам гардидани шумораи дипломи аълоро ректори донишкадаи мазкур Муҳриддин Низомӣ чунин шарҳ дод: “Ин шумора барои як донишкадаи калон албатта кам аст, лекин ин сабабҳои худро дорад. Ман худ дар имтиҳонҳо иштирок мекунаму мебинам, ки бачаҳо фаъоланд ва истеъдоди баланд доранд. Аммо баҳои пасте, ки онҳо дар давоми таҳсил доранд, монеи дипломи аъло гирифтани онҳо гардидааст”.

Инчунин мавзӯи дигаре, ки баҳси гармеро дар ин нишасти хабарӣ ба бор овард, ин иқдоми роҳбарияти донишкада ҷиҳати бе ММТ қабул шудани довталабон ба ин донишкада мебошад. Ректори донишкада қайд намуд, ки тасмим доранд аз соли оянда тариқи имтиҳонҳои анъанавӣ, яъне бидуни ММТ донишҷуёне, ки истеъдоду маҳорати баланд доранд, қабул намоянд. Ӯ афзуд: “Ин иқдоми мо агар дастгирӣ ёбад, мо фикр мекунем, ки дар оянда сафи хатмкунандагон бо дипломи аъло дар ин муассисаи таълимӣ зиёд мегардад. Зеро ин ҷо ҷои истеъдодҳост ва онҳоро бо истеъдодҳои табиияшон бояд баҳогузорӣ намуд”.