Донишгоҳи давлатии омӯзгории Тоҷикистон ба номи Садриддин Айнӣ китоби “Донишномаи химия”-ро тариқи нашриёти “Эр-Граф” нашр кард.

Донишнома дорои 416 саҳифа мебошад. Вазири маориф ва илми ҷумҳурӣ, профессор Нуриддин Саид дар пешгуфтори китоб навиштааст, «ин донишнома омӯзаҳои толибилмонро, ки аз китобҳои дарсӣ ҳосил кардаанд, мукаммал месозад, нуктаҳо ва матлабҳои навро ба дониши онҳо меафзояд, дар зеҳни онҳо қобилияти маърифати мустақилонаи масъалаву муаммоҳои илмро парвариш медиҳад».

«Донишномаи химия» роҷеъ ба пайдоиш ва таърихи илми химия, мафҳумҳо ва қонунҳои калидӣ, мақоми олимони ҷаҳон дар рушди химия, кашфиёту ихтирооти барҷастаи онҳо, тавсифи қонуниятҳои химиявӣ ва ҷадвали даврӣ, хосиятҳои гуногуни элементҳои  химиявӣ ва амсоли инҳо маълумот медиҳад.

«Донишномаи химия», ки аз ҷониби олими шинохтаи илми химия Лутфулло Солиев бо забони саҳеҳу оммафаҳм мураттаб гардидааву зери назари академик Носирҷон Салимӣ ба нашр расидааст, барои ҷавонон ва наврасон пешкаш шудааст. Ҳамчунин, китоб дар такмили сифати омӯзиши химия дар мактабҳо ва дигар муассисаҳои таълимӣ ҳиссаи сазовор хоҳад гузошт.