Мегӯянд мард давлат аст. Идора мекунад, муҳофизат мекунад, соҳибӣ мекунад. Зан халқ аст, давлатро бар мӯҳри худ устувор медорад.

Дар ҳама давру замон зан нерӯи тавонои офарандагӣ ва саодатмандиро соҳиб буд. Ӯ доимо сазовори парастиш ва эҳтиром мебошад, зеро ҳузури бонувон ба мардон қуввату матонат бахшида, онҳоро ба меҳру вафо ва маданияти бузурги инсонӣ ҳидоят менамояд. Чунонки Пешвои миллат, муҳтарам Эмомалӣ Раҳмон қайд намудаанд: “Давлат ва Ҳукумати Тоҷикистон ғамхорӣ ба занонро бахши муҳими сиёсати иҷтимоии худ медонад”.

Боло бурдани мавқеи зан дар ҷомеа ва вусъат бахшидан ба фаъолияти онҳо дар корҳои давлатӣ боз як далели қадршиносӣ ва ғамхорӣ дар ҳаққи онҳост. Ҷалби ҳар чӣ бештари занон ба ҳаёти сиёсиву иҷтимоӣ ба хотири қадр ва арҷгузорӣ ба нақшу мақоми онҳо мебошад. Айни замон занону бонувон ҳамрадифи мардон шуда, ба хотири пешрафти Ватани азизамон саъйюу талош доранд.

Моҳтобӣ Шамсиддинова як тан аз он занҳоест, ки бо ҷаҳонбинии васеъ ва дониши баланди худ солҳост, ки ба тарбияи насли ҷавон машғул аст. Ӯ соли 2008 фаъолияти меҳнатии худро дар муассисаи таҳсилоти умумии №14-и шаҳри Сарбанд аз омӯзгори фанни забон ва адабиёти тоҷик оғоз намуда, солҳои 2009-2013 ҳамчун омӯзгори ҳамин фан дар мактаб – литсеи касбии кимиёии саноатии шаҳри Сарбанд ва солҳои 2013 то 2016 мутахассиси раёсати таҳсилоти Донишкадаи давлатии Қӯрғонтеппа ба номи Носири Хусрав адои вазифа намудааст. Соли 2016 ба Донишкадаи давлатии забонҳои Тоҷикистон ба номи Сотим Улуғзода ба кор меояд. Дар як муҳлати кӯтоҳ ба вазифаи ҷонишини декани факултети забонҳои романӣ-германӣ ва моҳи феврали соли 2017 ба вазифаи ҷонишини декан оид ба таълим дар факултети филологияаи тоҷик таъин шуд.

Муаллима ба ҷавонии худ нигоҳ накарда, бо ғайрату ҷасорат ба иҷрои вазифа шуруъ намуд. Ҳамеша кӯшиш менамояд, ки дар иҷрои вазифа фаъол ва намуна бошад. Ҳарчанд, ки ин вазифа мушкил ва серталаб буд, вале Моҳтобӣ аз уҳдаи он ба хубӣ мебаромад. Дар муддати кӯтоҳ бо хислати хубаш сазовори обрӯи баланд гардид.
Рӯзе баъд аз дарс ба синфхона даромадам, ӯро дар ҳалқаи донишҷӯён дарёфтам, ки самимиву болида суҳбат менамуд. Вақте аз махсусияти касби омӯзгорӣ пурсидам, боифтихор гуфт:

- Омӯзгор бояд бомаърифат, меҳрубон, фидокор ва баъзан сахтгир бошад. Шогирдонро дар руҳияи худшиносию ватандӯстӣ, одаму одамгарӣ тарбия кунад. Дар шароити имрӯза ба хотири ҳифзи фарҳангу маърифат, таълиму тарбияи ҷавонон тарбия ахлоқу одоби ҳамидаи насли ҷавон ҳамаи омӯзгорон дастаҷамъона бояд ҳиссагузор бошанд.

Моҳтобӣ Шамсиддинова аз зумраи омӯзгорони ҷавону умедбахшест, ки бо донишу хислати ибратомӯзи худ дар донишкада сазовори иззату эҳтиром аст. Мукофоти олии ӯ эҳтирому қадрдонии ҳамкасбону шогирдон мебошад.

Назруллои ОЛИМ,корманди ДДЗТ ба номи С. Улуғзода