Имрӯз дар тамоми соҳаҳо дар баробари дигар қишрҳои ҷомеа ҷавонон низ пайи кору фаъолият буда, дар баробари ин баҳри амалӣ намудани донишҳои назариявию амалии хеш ба навоварӣ машғуланд. Зиёдулло Обидов яке аз чунин ҷавонҳост, ки ихтироъҳои ӯ ба соҳаҳои «Муҳофизати ашё ва маснуоти пулодӣ аз коррезия» ва «Металлургия» тааллуқ доранд.

Зиёдулло 2 марти соли 1982 таваллуд шудааст. МТМУ №1-и ноҳияи Айнӣ ва факултаи Донишгоҳи техникии Тоҷикистон ба номи академик М.С. Осимиро соли 2004 бо ихтисоси технологияи химиявии моддаҳои ғайриорганикӣ хатм кардааст.

Баъди хатми донишгоҳ ба ҳайси ассистенти кафедраи технологияи истеҳсолоти электрохимиявӣ ба кор шуруъ менамояд. Соли 2009 дар Шӯрои диссертатсионии назди Институти химияи АИ Ҷумҳурии Тоҷикистон рисолаи номзадиро аз рӯи ихтисоси кимиёи физикӣ дифоъ намуд. Солҳои 2008-2009 дар вазифаҳои ходими хурд ва ходими калони илмии озмоишгоҳи маводҳои ба коррозия устувори Институти химияи АИ Ҷумҳурии Тоҷикистон фаъолият намудааст.
Ихтирооте, ки Зиёдулло сомон додаасту соҳиби патент гардидаанд инҳоянд:

1. «Хӯлаи алюминий-бериллий бо металҳои нодирзаминӣ»
2. «Дастгоҳ барои ченкунии гармиғунҷоиши ҷисмҳои сахт»
3. «Хӯлаи рӯҳ-алюминий»

Ихтирооташ дар корхонаи «Тоҷиктекстилмаш» ба сифати рӯйпӯшҳои зиддикоррозионӣ истифода шудааст, ки фоидаи умумии иқтисодиашон 13965 сомониро ташкил дод. Инчунин ихтирооташ дар Донишгоҳи техникии Тоҷикистон ба номи М. Осимӣ барои иҷрои корҳои илмӣ-озмоишии аспирантон, магистрантон ва донишҷӯён мавриди истифода қарор дорад.

Ӯ барандаи Ҷоизаи Ҷумҳурии Тоҷикистон ба номи Исмоили Сомонӣ барои олимони ҷавон дар соҳаи илм ва техника (2009) буда, соли 2014 ба дарёфти дипломи озмуни байналмилалии «Беҳтарин олими ҷавони АвруОсиё» мушарраф гардидааст.

Айни замон дар вазифаи дотсенти кафедраи металлургияи факултети технологияҳои инноватсионии ДТТ ба номи М. Осимӣ фаъолият менамояд.

Беҳрӯз ХОЛМУРОДОВ, “ҶТ”