МУАЛЛИФ: МАШҲУР ИМОМНАЗАРОВ

Бо ибтикори Раёсати маориф ва илми ВМКБ дар шаҳри Хоруғ семинари илмӣ-методӣ доир шуд, ки дар он устодони собиқадор, омӯзгорони ҷавони кафедраи филологияи англисии Донишгоҳи давлатии Хоруғ ва макотиби вилоят иштирок намуданд.

Гулнамо Дӯстамбаева, мудири кафедраи забонҳои хориҷии ДДХ тавзеҳ дод, ки ҳадаф аз доир кардани чунин чорабинӣ, пеш аз ҳама тақвият додани ихтисосу малакаи омӯзгорони ҷавон, ташаккули маҳорати таълиму тадрис ва ҳамзамон боло бардоштани касбияти муаллимон аст.

- Чанд тан аз устодони собиқадори вилоят ҷиҳати такмил додани маълумоти касбӣ қаблан аз барномаҳои таълимие, ки Вазорати маориф ва илми Ҷумҳурии Тоҷикистон дар якҷоягӣ бо сафорати Амрико дар Душанбе барои онҳо омӯхт, баҳравар гардиданд. Феълан муаллимони ҷавон тариқи семинар бо нозукиҳои ин барнома шинос шуданд ва итминон аст, ки баъди амалан ҷорӣ шудани чунин методҳои муосир дар донишгоҳ, донишҷӯён низ ба машғулиятҳои муфид ҷалб мешаванд, - афзуд Г. Дустамбаева.

Дар қисматҳои назариявию амалии семинар, ҳамчунин мавзӯъҳои “Мақоми бонувон дар ҷомеаи муосир”, “Такмили вижагии маҳорату омӯзиш”, “Интихоби сабки дурусти муошират тариқи забони англисӣ” ва ғайра мавриди баррасии иштирокдорон қарор гирифт.