Офаридани асбоб ва ё таҷҳизот на ба ҳар кас муяссар мегардад. Зеро барои ихтироъкорӣ дар баробари шавқу завқ доштан, инчунин донишҳои гуногуни вобаста ба соҳа зарур аст.

Ҳамзаалӣ Файзов, пас аз он ки шавқи беандоза ва донишҳои азбарнамудааш бо ҳам омаданд, тасмим гирифт, ки дар касби дӯстдоштааш навгонӣ эҷод кунад. Бо ин мақсад баҳри амалӣ намудани идеяи аввалини худ камари ҳиммат баст ва инак таҷҳизоте, ки ӯ ихтироъ кардааст, “Мавҷхомӯшкунаки телефонӣ” ном дорад. Ӯ пас аз мушоҳидаву ҷустуҷӯҳои зиёд ба хулоса омад, ки чунин кашфиёт имкон дорад. Бо ин мақсад муддати се моҳ ба таҳияи он машғул шуд ва билохира онро дар шакли муайян сохта ба анҷом расонд.

- Бисёр донишҷӯёнро мебинем, ки дар синфхона ба телефонбозӣ машғуланд. Ё ин ки интернет истифода мекунанд. Дар баробари ин, дар маҷлисгоҳҳо садои телефонҳои мобилӣ ба рафти чорабиниҳо халал мерасонанд. Аз ин рӯ, пас аз мушоҳидаҳо ба чунин хулоса омадам, ки таҷҳизоте созам, то ин гуна “халалрасонҳо”-ро пешгирӣ намояд. Аз ҷумла, мавҷи телефон ва интернет, яъне вайфай (WiFi)-ро низ”, - мегӯяд Ҳамзаалӣ Файзов.  

Таҷҳизоти сохтаи ӯ мавҷи телефон ва интернети то дурии панҷоҳ метр фаъолбударо хомӯш менамояд.

- Ба соҳаи илму ихтироъкорӣ таваҷҷуҳи ҷавонон имрӯз хеле назаррас аст,- иброз дошт ӯ. – Чун асри мо асри технология аст, дар тамоми рӯи олам таваҷҷуҳи аввалиндараҷа ба технология дода мешавад. Аз ин ҷиҳат, бисёре аз ҷавонон кӯшиш менамоянд, ки ягон таҷҳизот ихтироъ намоянд. Ин буд, ки чунин асбобро офаридам.
Ҳамзаалӣ Файзов 20-уми апрели соли 1995 дар ноҳияи Ховалинг таваллуд шудааст. Соли 2013, пас аз хатми Гимназияи №1-и ноҳия ба факултети технологияи иттилоотӣ ва коммуникатсионии Донишгоҳи техникии Тоҷикистон ба номи М. Осимӣ дохил шуда, айни ҳол донишҷӯи курси чорум аст

Беҳрӯз ХОЛМУРОДОВ, "ҶТ"