Санаи 31-уми январ дар толори Маркази матбуоти ҷумҳуриявии “Ховар” нишасти матбуотии Маркази миллии тестии назди Президенти Ҷумҳурии Тоҷикистон баргузор шуд.

Директори марказ Хуршед Икромӣ зимни суханронии худ доир ба фаъолияти марказ дар соли 2018 хизматрасонии “Пешномнависӣ”-ро яке аз навгониҳои низоми ИМД номид. Ӯ аз ҷумла қайд намуд:

“Низоми “Пешномнависӣ” дар ҳолати бархат (онлайн) ба довталаб имкон медиҳад, ки ӯ дар хона бо ёрии падару модар, ё устодон ихтисоси ояндаашро интихоб намуда, баъдан ба яке аз нуқтаҳои бақайдгирӣ ҷиҳати расман номнавис кардани худ ҳозир шавад. Яъне низоми “Пешномнависӣ” ба довталаб имкон медиҳад, ки довталаб дигар дар назди нуқтаҳои бақайдгирӣ соатҳо вақти худро сарф намуда интизорӣ накашад.

Соли 2018 дар 55 шаҳру ноҳияҳои ҷумҳурӣ нуқтаҳои доимӣ ва сайёрии бақайдгирӣ ташкил карда шуд. Ва мутобиқи тартиби муқаррарнамудаи Ҳукумати Ҷумҳурии Тоҷикистон дар ду марҳила 95819 нафар довталаб аз қайд гузаштанд. Аз шумораи умумии довталабони азқайдгузашта 89353 нафарашон имтиҳон супориданд ва аз инҳо 70 ҳазору 822 нафар ба озмуни тақсимот роҳ ёфта, 60 ҳазору 701 нафарашон сазовори номи донишҷӯ гардиданд.”

Дар солҳои қаблӣ довталабоне, ки аз Маркази миллии тестӣ ноком мешуданд, таҳсилоти худро дар коллеҷҳои хусусӣ идома дода, пасон ба муассисаҳои олӣ интиқол мегирифтанд. Вобаста ба ин масъала Хуршед Икромӣ чунин ибрози ақида кард:

“Ҳукумати кишвар ин камбудиро дар соли 2019 бартараф намуд. Яъне дар соли 2019 тамоми муассисаҳои касбӣ ва олӣ ба Маркази миллии тестӣ ворид шуданд.”

Маврид ба зикр аст, ки Маркази миллии тестии назди Президенти Ҷумҳурии Тоҷикистон соли 2014 таъсис ёфта, мақсади асосии он шаффоф гузаронидани имтиҳонҳои марказонидаи дохилшавӣ ва аз байн бурдани амалҳои коррупсионӣ мебошад.