5 апрели соли равон дар МТМУ №101-и шаҳри Душанбе вохӯрии вазирони маориф ва илм ва корҳои дохилии мамлакат бо директорони муассисаҳои таҳсилоти умумии пойтахт, устодон, падару модарон ва хатмкунандагони муассисаҳои таълимии рақамҳои 54, 43 ва 101 доир гардид.

Вохӯрӣ бо тамошои филми мустанад дар бораи ҳуқуқвайронкунии ноболиғон, ки аз ҷониби Маркази матбуоти Вазорати корҳои дохилӣ омода гардида буд, оғоз ёфт.
Тавре вазири маориф ва илми кишвар Саид Нуриддин Саид иброз дошт, ҷамъомади мазкур ҷиҳати пешгирии ҳолатҳои ҳуқуқвайронкунии ноболиғон ва наврасону ҷавонон гузаронида мешавад. Албатта, он филме, ки дар мавриди кирдорҳои нохушоянди хонандагони муассисаҳои таълимӣ ба намоиш гузошта шуд, бояд кормандони соҳаи маориф ва падару модаронро бетараф нагузорад. Бинобар ин, устодон, омӯзгорон, волидон бояд дар ҳамкорию ҳамбастагӣ бо мактабу маориф ва мақомоти ҳифзи ҳуқуқ амал намуда, ба таълиму тарбияи насли наврас диққати аввалиндараҷа диҳанд. Тавре Пешвои миллат, муҳтарам Эмомлӣ Раҳмон ҳамеша дар суҳбату мулоқотҳояшон таъкид менамоянд, ояндаи давлат ва пешрафту инкишофи он аз таълиму тарбияи дурусти насли наврас ва ҷавонон вобастагии калон дорад.



Сипас, вазири корҳои дохилии кишвар, генерал-лейтенанти милитсия Раҳимзода Рамазон Ҳамро дар сунронии хеш зикр кард, ки дар партави сиёсати созандаю хирадмандонаи Асосгузори сулҳу ваҳдати миллӣ, муҳтарам Эмомалӣ Раҳмон дар саросари кишвар даҳҳо муассисаҳои таълимӣ бо тамоми таҷҳизоти замонавӣ бунёд ва ба истифода дода шуданд. Боз бунёди муассисаҳои нави таълимӣ идома дорад. Ҳамасола наврасону ҷавонони болаёқат дар олимпиадаҳои фаннии сатҳи ҷумҳуриявӣ ва байналмилалӣ иштирок намуда, соҳиби ҷойҳои намоён мегарданд, ки боиси ифтихори давлату миллат мебошанд. Вале, дар ин радиф баъзе аз мактаббачагон ба амалҳои номатлуб даст мезананд, ки боиси ташвишу нигаронист. Ҳодисаи нангине, ки шаби 2-юм ба 3-юми январи соли равон рух дод ва ҷони ду ҷавонро аз байн бурд, аз он шаҳодат медиҳад, ки баъзе мактаббачагон даст ба ҷиноят зада, ба падару модар, наздикону пайвандон ва мактабу маориф иснод меоранд. Албатта, агар ин наврасону ҷавонон ба дурустӣ таълиму тарбия мегирифтанд, ба чунин амалҳои номатлуб даст намезаданд.

Аз таҳлилҳо бармеояд, ки бархе наврасону ҷавонон аз мадди назари падару модарон дур монда, вақти худро дар марказҳои дилхушӣ, нуқтаҳои букмекерӣ ва интернет-кафеҳо гузаронида, ба бозиҳое, ки хусусияти зӯроварӣ доранд, машғул мешаванд. Ин амалҳо дар ниҳояти кор ба онҳо таъсири манфӣ расонда, даст ба ҳуқувайронкунӣ ва ҷиноят мезананд. Дар 2 моҳи сипаришудаи соли равон 3 ҳазору 500 нафар ноболиғон аз марказҳои дилхушию букмекерӣ ва интернет-кафеҳо дастрас шуда, фаъолияти 72 марказҳои дилхушӣ манъ карда шудааст.

Дар ин ҷода нисбат ба падару модароне, ки дар таълиму тарбияи фарзанди худ беэътиноӣ зоҳир менамоянд, мутобиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» чораҳои дахлдор андешида мешавад. Танҳо дар давоми соли 2016 дар асоси Қонуни мазкур 4 ҳазору 400 протоколи маъмурӣ тартиб дода шуда, волидайни ноболиғоне, ки даст ба ҳуқуқвайронкунӣ задаанд, ба ҷавобгарии маъмурӣ кашида шуданд.

Раҳимзода Рамазон Ҳамро, ҳамчунин таъкид дошт, ки Душанбе ҳамчун пойтахт маркази тамаддун ва маърифат буда, мактаббачагон, бояд маданияти шаҳрдориро дар сатҳи баланд риоя намоянд ва наврасону ҷавонони музофот бояд амалу кирдори неки онҳоро омӯзанд.

Дар идомаи сухан вазири корҳои дохилӣ ҷиҳати пешгирии ҳуқуқвайронкунӣ ва ҷинояткорӣ дар байни ноболиғону наврасон ва ҷавонон як қатор пешниҳодҳои судманд ироа намуд. Аз ҷумла, таъкид кард, ки мактаббачагон бояд пайваста ба омӯхтани илму дониш, иштирок дар маҳфилҳои гуногун, мусобиқаҳои варзишӣ, дӯст доштани Ватан ва арҷгузорӣ ба арзишҳои миллӣ бояд бештар мароқ зоҳир намуда, аз амалу кирдорҳои ношоиста дурӣ биҷӯянд.

Дар анҷом дар байни иштирокдорон ва вазирони маориф ва илм, корҳои дохилӣ сӯҳбати озоду самимӣ доир гардида, аз ҷониби омӯзгорон, хонандагон ва ҷавонони фаъол як қатор пешниҳодҳои судманд ҷиҳати пешгирии ҳуқуқвайронкунӣ иброз гардид.