Пайванди Гулмуродзода яке аз равшанфикрони Тоҷикистони навин аст

Ин нукта зимни баргузории конфронси ҷумҳуриявии илмю амалии “Масъалаҳои таҳқиқи ҷараёни маорифпарварӣ ва матбуот”, ки ба ифтихори 60-солагии муҳаққиқи равоншод Пайванди Гулмуродзода сурат гирифт, зикр шуд.

Конфронсро Саъдии Маҳдӣ, декани факултаи журналистика оғоз намуда, иштирокдоронро хайрамақдам гуфт.

Салимзода Олимҷон, вакили Маҷлиси намояндагони Маҷлиси олии Ҷқмҳурии Тоҷикистон доир ба  ҳаёту фаъолияти Пайванди Гулмуродзода маърӯза намуда, таъкид намуд, ки 11 март, ки ҳар сол ҳамчун рӯзи матбуоти тоҷик ҷашн гирифта мешавад, маҳз бо талош ва пешниҳоди П. Гулмуродзода сурат гирифтааст. О. Салимзода пешниҳод кард, ки кӯча  ё мактабе дар кишвар ба номи Пайванди Гулмуродзода гузошта шавад.

Сипас, Маҷид Салим, мудири шуъбаи очерк ва публисистикаи Иттифоқи нависандагони Тоҷикистон дар мавзӯи "Пайванди Гулмуродзода – адиб, публитсист" суханронӣ намуда, “Дарё равон аст” ном очерки  Гулмуродзодаро, ки дар бораи Валӣ Самад навиштааст, беҳтарин очерк дар публитсистикаи тоҷик арзёбӣ намуд.

Зинатулло Исмоилзода, раиси Иттифоқи журналистони Тоҷикистон зимни суханрониаш саҳми Пайванди Гулмуродзодаро дар рушди журналистикаи тоҷик баланд хонд, ҳамчун шогирди марҳум аз хизматҳои шоёни ӯ дар соҳаи маориф ва журналистикаи тоҷик ёддоштҳои худро баҳри ҳозирин ҳикоят намуд.
Дар Конфронс инчунин профессор Мурод Муродов ва дигар ҳамкорону ҳамкасбони Пайванди Гулмуродзода аз саҳму хизматҳои муҳаққиқ дар журналистикаи тоҷик ёдовар шуданд.

Конфронс бо ташаббуси факултети журналистикаи ДМТ, Иттифоқи нависандагони Тоҷикистон, Иттифоқи журналистони Тоҷикистон, Шӯрои ВАО-и Тоҷикистон дар толори Шарифҷон Ҳусейнзода доир гардид.