Бо мақсади густариши тадқиқоти илмӣ дар самти рушди устувор, "иқтисоди сабз" ва сайёҳиву соҳибкорӣ бо қарори Ҳукумати кишвар дар назди Донишгоҳи байналмилалии сайёҳӣ ва соҳибкорӣ пажӯҳишгоҳҳои илмию таҳқиқотии " Иқтисоди сабз" ва "Сайёҳӣ ва соҳибкорӣ" таъсис дода шуданд.

Ин нуктаро 2 август Убайдулло Асрорзода, ректори Донишгоҳи байналмилалии сайёҳӣ ва соҳибкории Тоҷикистон зимни нишасти матбуотӣ баён намуд.

“Таъсиси ин сохторҳо ҷиҳати тиҷоратикунонии натиҷаҳои таҳқиқоти илмӣ ва пайванди илм бо истеҳсолот мусоидат хоҳад кард. Ҳамчунин, кӯшиш мекунем, ки нашри мақолаҳои илмиро дар маҷаллаҳои бонуфузи ҷаҳонӣ зиёд намуда, Тоҷикистонро дар арсаи байналмилалӣ ҳамчун "кишвари сабз" бештар ва ҳадафмандона муаррифӣ намоем”, - гуфт ректори донишгоҳ.

Гуфта шуд, ки дар шашмоҳаи аввали соли ҷорӣ дар сохтори донишгоҳ 2 пажӯҳишгоҳи илмӣ - таҳқиқотӣ, 3 институти таълимӣ, 10 марказ ва дигар воҳидҳои сохтори вобаста ба меъёрҳои ҷаҳонии муассисаҳои таҳсилоти олии касбӣ таъсис дода шуд.