Имрӯз - 15 апрел бахшида зодрӯзи Қаҳрамони Тоҷикистон, асосгузори адабиёти муосир ва фарҳангу маданияти навини тоҷик устод Садриддин Айнӣ дар толори Ганҷинаи профессор Шарифҷон Ҳусейнзодаи Донишгоҳи миллии Тоҷикистон таҳти унвони “Устод Айнӣ ва адабу фарҳанги миллӣ” маҳфили илмию адабӣ доир гардид.

Дар чорабинии мазкур, ки бо ташаббуси кафедраи назария ва адабиёти навини форсии тоҷикии факултети филологияи Донишгоҳ роҳандозӣ шуд, профессор Сироҷиддини Эмомалӣ, декани факултети филология, Маҳмадизода Қарор, мудири кафедраи назария ва адабиёти навини форсии тоҷикии факултети филология, Ҳафиз Раҳмон, муаллими калони кафедраи мазкур, Кӯчарзода Аламхон, профессор, узви вобастаи АМИТ, Абдулҳай Маҳмадаминов доктори илмҳои филология, профессор иштирок ва суханронӣ намуданд.

Сироҷиддини Эмомалӣ, декани факултети филологияи донишгоҳ, зимни баромади худ иброз дошт, ки “Устод Айнӣ барои босавод кардани мардум, ашъори гаронбаҳои маърифатию маорифпарварӣ эҷод намуда, ба мо мерос гузоштааст. Ӯ ба ҳайси муаллими миллати тоҷик ва ба сифати шиносномаи миллати тоҷик дар як давраи тақдирсоз зиндагӣ кардааст. Эҷодиёти устод то имрӯз қадру манзалати худро гум накардааст ва бо мазмуни баланду хусусиятҳои хоси даъватомези худ асрҳои аср зиндаю ҷовид хоҳад монд”.

Ҳамчунин донишҷӯёни факултети мазкур аз осори устод Айнӣ порчаҳои шеърӣ қироат карданд.

Ёдовар мешавем, ки имрӯз -15 апрел ба зодрӯзи устод Садриддин Айнӣ 146 сол пур мешавад. Нахуст пеш аз оғози маҳфили илмӣ – адабии мазкур зумрае аз устодону донишҷӯёни факултети филологияи донишгоҳ ба зиёрати оромгоҳи ин устоди бузурги сухану адаб - ба Боғи фарҳангию фароғатии ба номи С.Айнӣ рафта, ёде аз рӯзгору осори устод Айнӣ намуданд.