Имрӯз бо судури 4 Фармон ва 5 Қарор Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар баъзе сохторҳо тағйироти кадрӣ ба амал оварданд.

Чигунае ки дафтари матбуотии Президенти мамлакат иттилоъ доданд, дар асоси ин тағйироти кадрӣ раиси шаҳри Ҳисор, раиси ноҳияи Шоҳмансури шаҳри Душанбе, сардори Хадамоти зиддиинҳисории назди Ҳукумати Ҷумҳурии Тоҷикистон, муовини директори Агентии суғуртаи иҷтимоӣ ва нафақа, ректори Муассисаи давлатии таълимии “Донишгоҳи технологии Тоҷикистон” ва роҳбарони баъзе сохторҳои дигар иваз шуданд.

Ҳамин тариқ, Қосим Роҳбар аз вазифаи раиси шаҳри Ҳисор озод шуда, ба ҷойи ӯ Носирзода Ҷаббор, ки то ин дам муовини якуми вазири кишоварзии Ҷумҳурии Тоҷикистон буд, раиси шаҳри Ҳисор таъйин шуд. Дар ҷойи Билол И. Олимзода С.М. раиси ноҳияи Шоҳмансури шаҳри Душанбе таъин гардид.

Раҳмон И.Х. бошад, сардори Хадамоти зиддиинҳисории назди Ҳукумати Ҷумҳурии Тоҷикистон таъин гардид. Роҳбарии Муассисаи давлатии таълимии “Донишгоҳи технологии Тоҷикистон” бошад ба зиммаи Раҳмонзода З.Ф. вогузор карда шуд. Ба ҷойи Наимӣ А.Қ. Ҷалолзода Ф.М. муовини директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон таъин гардид.