Ба иттилои Комиссияи марказии интихобот ва раъйпурсии Тоҷикистон, дар раъйпурсии дирӯз 94,7 дарсади раъйдиҳандагон ба ҷонибдорӣ аз ворид кардани тағйиру иловаҳо ба Конститутсия овоз додаанд.

Бахтиёр Худоёрзода, раиси КМИРТ гуфт, дар раъйпурсӣ аз 4 миллиону 402 нафари дорои ҳаққи раъй беш аз 4 миллиону 38 хазорашон овоз додаанд, ки 92 дарсадро ташкил медиҳад. Ҳамагӣ 3,3% муқобили ворид кардани тағйирот ба Конститутсия раъй додаанд.

Ҷараёни раъйпурсиро 120 нозири байналмилалӣ аз кишварҳои узви Иттиҳоди давлатҳои мустақил, Созмони ҳамкориҳои Шанхай ва корпуси дипломатҳои хориҷии муқими Тоҷикистон назорат карданд. Владимир Гаркун, роҳбари миссияи мушоҳидони байналмилалӣ аз ИДМ гуфт, раванди раъйдиҳӣ дар фазои озод сурат гирифта, нозирон ягон хатои ҷиддиро мушоҳида накардаанд. Ван Кайвэн, муовини дабири кулли Созмони ҳамкориҳои Шанхай низ ҳамапурсиро дар доираи қонунҳо баргузоршуда арзёбӣ намуда, гуфт, ҳеҷ қонуншикание ба қайд нагирифтаанд.