Мақсади асосии фаъолияти Давлату Ҳукумат, тамоми чорабинию тадбирҳо, қабули қонунҳо, стратегияву барномаҳо, амру фармонҳои Сарвари давлат таъмини рушди босуботи мамлакат ва зиндагии шоистаи мардуми кишвар мебошад, - гуфта шуд аз ҷониби гурӯҳи таблиғотӣ оид ба шарҳу эзоҳи Паёми Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар мулоқот бо сокинони Ҷамоати деҳоти Пӯлодони шаҳри Конибодом.

Аз ҷумла, вакили Маҷлиси намояндагон Равшан Раҷабов зикр намуд, ки дар нимаи моҳи январ пурра аз байн бардоштани маҳдудияти таъмини аҳолӣ бо нурӯи барқ гувоҳи он аст, ки Ҳукумати мамлакат таҳти роҳбарии Пешвои миллат, муҳтарам Эмомалӣ Раҳмон ба яке аз ҳадафҳои стратегии худ – истиқлолияти энергетикӣ торафт наздик мешавад ва баъди ба кор даромадани нахустин агрегати НБО-и “Роғун” дар соли 2018 Ҷумҳурии Тоҷикистон пурра ба истиқлолияти энергетикӣ мерасад.

Дар мулоқот, ҳамчунин аъзои дигари гурӯҳи таблиғотӣ – сардори Раёсати кор бо ҷавонони Кумитаи ҷавонон, варзиш ва сайёҳӣ Дилноза Аҳмадзода, судяи Суди Олии иқтисодии вилояти Суғд Нурулло Муҳиддинӣ, устоди Донишгоҳи миллӣ Қобилҷон Барфиев оид ба зарурати иштироки сокинон дар нигоҳдорӣ ва таҳким бахшидани суботу оромӣ дар ҷомеа, таълиму тарбияи дурусти фарзандон, ба таҳсили босифат фаро гирифтани ҷавонону наврасон, таъсиси марказҳои таҳсилу касбомузӣ барои калонсолон, рушди соҳибкорӣ, азхуд намудани заминҳои бекорхобида, ташкили корхонаҳои нави хурду миёна оид ба истеҳсоли маҳсулот ва коркарди меваю сабзавот, ба вуҷуд овардани инфрасохтори замонавии соҳаи сайёҳӣ ҷиҳати муҳайё сохтани  ҷойҳои нави корӣ  ва дигар паҳлӯҳои Паёми Сарвари давлат ибрози назар намуданд.
    
Дар мулоқот сокинон низ ба сухан баромада, ба Пешвои миллат барои таъмини суботу оромӣ дар ҷомеа, шароити мусоиди кору зиндагӣ ва таҳсил, ғамхорӣ дар ҳаққи мардуми куҳистон, алалхусус оилаҳои камбизоат ва ашхоси бемору бепарастор арзи сипоси бепоён карда, изҳор доштанд, ки дар иҷрои дастуру супоришҳои Сарвари давлат ва нақшаю барномаҳои Ҳукумати мамлакат ҳиссаи сазовор хоҳанд гузошт.