Ҷумҳурии Тоҷикистон аллакай ба марҳалаи нави рушди давлатдорӣ ворид гардид. Инро бояд пеш аз ҳама насли ҷавон дарк намояд. Муҳимтар аз ҳама, миллати мо бояд имрӯз умеди бештар ба ояндаи дурахшони Ватан дошта бошад, зеро таҷрибаи давлатдории мо нишон дод, ки аз кадом мушкилоти сахту сангини замон сарбаландона баромадаем ва дар табдил додани ҳар бадбахтӣ ба хушбахтӣ қодирем.

Чуноне, ки Пешвои миллат, Президенти мамлакат дар Паёми имсолаи хеш ба Маҷлиси Олии Ҷумҳурии Тоҷикистон таъкид карданд: “Соли 2020 бо тамоми мушкилоташ собит намуд, ки мо барои боз ҳам беҳтар зистан, обод намудани Ватани азизамон ва тараққӣ додани давлати соҳибистиқлоламон неру, имконият, таҷриба, шароит ва захираҳои заруриро дорем”.

Бояд тазаккур дод, ки дар соли 2020 бо вуҷуди мушкилоти шадид давлату ҳукумат такягоҳи асосии мардум ва дар баробари худ халқи шарифи кишвар такягоҳ ва кумакрасони кишвари худ буданд. Ҷавонони хеле зиёде бидуни ягон музд ба сифати ризокор (волонтёр) ба ҷомеа хизмат карданд. Соҳибкорони ватандӯст ба ниёзмандон кумаки моддӣ расонданд. Хулоса, ҳеҷ кас дар саҳмгузорӣ бетараф набуд. Ин аст арзиши давлатдорӣ дар замони муосир. Халқи мо бори дигар қудрати ваҳдату ҳамдигарфаҳмиро исбот кард, ки боиси ифтихору хушбахтист. Давлату Ҳукумат бо барномаҳои мушаххас тавонист, сатҳи буҳронро паст намояд ва дар танзимнамоӣ муваффақ шавад.

Нуктаи дигаре, ки дар Паёми Пешвои миллат ба Маҷлиси Олии Ҷумҳурии Тоҷикистон зикр гардид ва боз ҳам аз ваҳдати комили ҷомеа, инчунин, аз маърифати баланди сиёсии халқи кишвар дарак медиҳад, ин баргузории ду маъракаи интихобот дар Ҷумҳурии Тоҷикистон мебошад.

Пешвои муаззами миллат муҳтарам Эмомалӣ Раҳмон фармуданд: “Ҳамчунин, бо иштироки фаъолонаи халқи азизамон соли гузашта, ду чорабинии бисёр муҳимми сиёсӣ, якум – интихоботи вакилони Маҷлиси намояндагон, маҷлисҳои маҳаллии вакилони халқ ва дуюм – интихоботи Президенти Ҷумҳурии Тоҷикистон дар фазои сулҳу оромӣ, суботи комили сиёсӣ ва ваҳдати миллӣ баргузор гардид”.

Маҳз дар фазои сулҳу оромӣ ва суботи комили сиёсӣ баргузор гардидани интихобот рукни асосии ҷомеаи демократӣ ва ҳуқуқбунёд дар замони муосир мебошад.

Соли 2020 дар ҳар кишваре, ки маъракаи интихоботӣ баргузор гардид, бидуни эътирозҳо ва бенизомии ҷамъиятӣ нагузашт. Таҳлилҳо нишон медиҳанд, ки дар ин эътирозҳо таъсири кишварҳои манфиатдор ва гурӯҳҳои ғаразнок дида шудааст. Воситаи асосии таъсиррасон ба тафаккури ин ҷомеаҳо интернет, махсусан шабакаҳои иҷтимоӣ арзёбӣ мешавад.

Дар Ҷумҳурии Тоҷикистон, бо вуҷуди баъзе аз андешаҳои иғвоангез дар шабакаҳои иҷтимоӣ, ки аз хориҷи кишвар пахш мегардиданд, халқи шариф бо рӯҳияи баланди ватандӯстӣ ва бо умеди интихоби ояндаи нек дар маъракаи интихобот иштирок карданд. Хусусан, насли ҷавони кишвар дар сатҳи баланд баргузор гардидани ин ду маъракаи муҳимми сиёсӣ саҳми арзанда гузоштанд. Аз ин ҷост, ки Пешвои миллат нисбати ин қишри ҷомеа эътимоди бузург доранд.

Бояд гуфт, ки дар замони муосир кишварҳо ва ҷомеаҳое муваффақ мешаванд, ки роҳбарияти олӣ нисбати ҷавонон ва дар баробари худ, ҷавонон нисбати давлату ҳукумат эътимоду бовар дошта бошанд. Суботи комил низ танҳо дар ин ҷомеаҳо буда метавонад.

Дар раванди ҷаҳонишавӣ ва интиқоли арзишҳои бегона тавассути филмҳо ва интернету шабакаҳои иҷтимоӣ ба кишварҳои миллӣ, ҳифзи манфиатҳои миллӣ ва фарҳанги аҷдодӣ вазифаи аввалиндараҷа боқӣ мемонад. Пеш аз ҳама фарҳангу таърихи миллатро омӯхтан лозим меояд. Дар асоси омӯхтан ва аз худ кардани он дар инсон худшиносии миллӣ пайдо мешавад. Худшиносӣ ғурури миллиро ба вуҷуд меорад ва шахс аз ҳастии хеш ва миллату таърихи ниёгони худ ифтихор менамояд. Маҳз ифтихори миллӣ боис мешавад, ки шахс ба сифати шаҳрванди беҳтарини кишвари худ баромад карда, дар рушди давлату ҷомеа ва хизмат ба халқи худ саҳми арзанда гузорад.

Барои ба ин ҳадафҳо расидан зарур аст, ки сатҳу сифати таълим дар муассисиаҳои таҳсилоти миёнаву олии кишвар баланд бардошта шавад. Фанни таърихи халқи тоҷик бо тамоми нозукиҳои худ ба наврасону ҷавонон омӯзонда шавад. Натанҳо дар мактабу донишгоҳҳо, балки бо ҷалби мутахассисон семинару суҳбатҳо бо афроди калонсол, инчунин, шахсоне, ки муваққатан бекоранд, дар маҳаллаҳо ва минтақаҳо гузаронда шавад.

Хуб мешуд, агар Кумитаи телевизион ва радиои назди Ҳукумати Ҷумҳурии Тоҷикистон дар ҳамкорӣ бо “Тоҷикфилм” ва Вазорати фарҳанг наворҳои видеоӣ ва филмҳои таърихӣ аз китоби “Тоҷикон”-и Бобоҷон Ғафуров таҳия ва намоиш диҳанд. Ин иқдомҳо, албатта, дар баланд бардоштани ҳувияти миллӣ ва маърифатнокии аҳолӣ нақши муҳим хоҳад дошт.

Фирӯз РАВШАНАЛИЕВ,
корманди МТС назди
Президенти Ҷумҳурии Тоҷикистон