Имрӯз Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Раиси Ҷумҳурии Халқии Хитой Си Ҷинпин дар робита ба 25-умин солгарди робитаҳои дипломатӣ миёни Тоҷикистону Чин барқияи табрикӣ ирсол намуд.

"Чоряк аср муқаддам Хитой ҳамчун ҳамсояи хайрхоҳ ва дӯсти боэътимод аз аввалин давлатҳое буд, ки соҳибистиқлолии Ҷумҳурии Тоҷикистонро ба расмият пазируфт ва кишварҳои мо ба ташаккулу густариши робитаҳои сифатан нави байнидавлатӣ ҳусни оғоз бахшиданд, - омадааст дар барқияи табрикии Пешвои миллат, муҳтарам Эмомалӣ Раҳмон. - Боиси хушнудист, ки тайи давраи сипаришуда муносибатҳои дӯстӣ ва ҳамкориҳои гуногунҷанбаи Тоҷикистону Хитой чӣ дар чорчӯбаи дуҷониба ва чӣ дар шакли бисёрҷониба бемайлон рушд намуданд. Имрӯз ба ҳамшарикии кишварҳои мо, ки дар асоси усулҳои ҳусни ҳамҷаворӣ, эҳтиром ва эътимод ба ҳамдигар, баробарҳуқуқӣ ва риояи мутақобилаи манфиатҳо бино ёфтааст, сатҳи баланди ҳамкорӣ хос аст".

Президенти кишвар дар идома гуфтааст: "Байни Тоҷикистон ва Хитой дар сатҳи олӣ ва баланди давлатӣ муколамаи доимии сиёсӣ ба роҳ монда шудааст ва дар ҷараёни он дидгоҳи усулии ҷонибҳо нисбат ба доираи васеи мушкилоти мубрами байналмилалӣ, аз ҷумла масъалаҳое, ки ба рӯзномаи СММ ва СҲШ шомиланд, ҳамсон ва ё ба ҳам бисёр наздик мебошанд. Мо муносибатҳои босуботи худро бо  Ҷумҳурии Халқии Хитой арзишманд медонем ва ба рушди мантиқии онҳо дархӯр ба рифоҳи мардумонамон эътимоди комил дорем. Дар дурнамои наздик ва дарозмуҳлат рушду тавсеаи минбаъдаи ҳамкориҳои гуногунҷанба бо ҳамсояи бузурги худ самти авлавиятноки сиёсати хориҷии Тоҷикистон боқӣ мемонад. Итминон дорам, ки ба солномаи пуршарафи дӯстии абадӣ ва заволнопазири Тоҷикистону Хитой дар оянда саҳифаҳои нави дурахшон илова хоҳанд гашт".

"Шуморо, Ҷаноби Олӣ, ба муносибати 25-солагии ба роҳ мондани робитаҳои дипломатии байни давлатҳоямон сидқан табрик намуда, бароятон саломатии бардавом, хушрӯзӣ ва комёбиҳои нав дар роҳи таъмини шукуфоии мардуми дӯсти Хитой орзумандам", - иброз доштааст, Сарвари давлат.

Раиси Ҷумҳурии Халқии Хитой Си Ҷинпин низ бо ирсоли барқияи табрикӣ ба Президенти Ҷумҳурии Тоҷикистон Эмомалӣ Раҳмон 25-умин солгарди ба роҳ мондани робитаҳои дипломатиро шодбош гуфтааст.

"Тоҷикистону Хитой ҳамсояҳои ба ҳам хайрхоҳ мебошанд ва онҳоро кӯҳҳои осмонбусу дарёҳо ба ҳам мепайванданд, - омадааст дар барқияи Раиси Ҷумҳурии Халқии Хитой. - Дӯстии халқҳои мо аз гузаштаи дур маншаъ мегирад. Тайи 25 соли истиқрори робитаҳои дипломатӣ муносибатҳои кишварҳои мо босубот ва самарабахш рушд меёбанд. Тамосҳову мубодилаи сафарҳо дар сатҳи баланд мунтазам ба роҳ монда шуда, сатҳи эътимоди мутақобилаи сиёсӣ пайваста боло меравад. Ҳамкории ду кишвар дар чорчӯби эъмори муштараки “Як камарбанд ва як роҳ”, ҳамчунин дар ҷодаи амниятӣ натиҷаҳои хуби барои мардумонамон воқеан ҳам судмандро ба бор меоварад".

Дар идома гуфта шудааст: "Ин ҷониб ба густариши минбаъдаи муносибатҳои Хитою Тоҷикистон аҳамияти хоса медиҳад. Ҷониби Хитой масири рушди Тоҷикистонро бо назардошти хусусиятҳои миллии кишвар, саъю талошҳои онро ҷиҳати ҳифзи амнияти миллӣ ва суботи дохилӣ, ҳамчунин пешбурди тараққии иҷтимоиву иқтисодӣ қотеона пуштибонӣ менамояд. Ба муносибати 25-солагии ба роҳ мондани муносибатҳои дипломатӣ миёни кишварҳои мо омодагии хешро ҷиҳати - дар якҷоягӣ бо Шумо - минбаъд ҳам таҳким бахшидани эътимоди мутақобилаи сиёсӣ, таъмиқи ҳамкорӣ ба хотири эъмори муштараки “Як камарбанд ва як роҳ” ва мунтазам ба зинаҳои нав баланд бардоштани муносибатҳои шарикии стратегии Хитою Тоҷикистон бар нафъи кишварҳо ва мардумонамон иброз медорам. Орзуманди таҳкиму рушди пайвастаи дӯстии Хитою Тоҷикистон мебошам".